काठमाडौं । प्रमुख प्रतिपक्षी दल नेपाली कांग्रेसका सांसद जीवन परियारले पोखरा क्षेत्रीय अन्तर्राष्ट्रिय विमानस्थलमा अन्तर्राष्ट्रिय उडान कहिलेदेखि हुन्छ ? भन्दै प्रश्न गरेका छन् । 

सोमबारको प्रतिनिधिसभा बैठकको शून्य समयमा बोल्दै उनले नेपाल एयरलाइन्सको जहाजबाट अन्तर्राष्ट्रिय उडान गर्न कसले रोक्यो भन्दै प्रश्न गरे । “प्रधानमन्त्रीज्यूले उद्घाटन गर्नु भएको पोखरा क्षेत्रीय अन्तर्राष्ट्रिय विमानस्थलमा अन्तर्राष्ट्रिय उडान कहिलेदेखि हुन्छ ? नेपाल एयरलाइन्सको जहाजबाट अन्तर्राष्ट्रिय उडान गर्न कसले रोक्यो ?,” परियारको प्रश्न थियो । 

उनले पोखरालाई नेपालको पर्यटन राजधानी घोषणा गरेपछि पूर्वाधार विकासको लागि संघीय सरकारले विशेष पहल गरिदिन माग गरे । 

साथै, उनले पृथ्वी राजमार्गमा चार लेनको काम भइरहेको भन्दै यसलाई चाडो सम्पन्न गर्न र पोखरामा सुविधा सम्पन्न बसपार्क अति आवश्यक भएकाले निर्माण गर्न सरकारको ध्यानाकर्षण गराए । “फेवाताल, बेगनासताल, रूपाताललगायत दिपांग, मैदी, खास्टे, न्यूरिनी र गुदे तालको संरक्षणसम्बन्धी गुरुयोजना निर्माण गरियोस् । सातताल लिंकरोड अलपत्र छ । त्यसको निरन्तरता दिइयोस्,” उनले भने । 

सांसद परियारले त्यसैगरी पोखरामा अन्तर्राष्ट्रिय सभाहल बनाउने कार्य समयमानै सम्पन्न गर्न तथा खेलकुदका पूर्वाधार निर्माणमा समेत जोड दिए । “कास्की जिल्ला क्षेत्र नं १ को मध्यपहाडी राजमार्गसँग जोडिएको राखि मिजुरे सडक खण्डको गहते बेंसी–गहते–मिजुरे–पोसी खण्ड कालोपत्रे गर्न भौतिक पुर्वाधार मन्त्रालयको ध्यानाकर्षण गराउँदछु,” उनले बैठकमा भने ।