काठमाडौं । काठमाडौं महानगर प्रहरी बलका प्रमुख राजु पाण्डेले चोर पक्राउका लागि काठमाडौं प्रहरीमा उजुरी दिएका छन् । महानगरपालिकाले सूचनाका लागि राखेको बोर्ड नै चोरी भएपछि पाण्डेले जिल्ला प्रहरी परिसर काठमाडौंमा उजुरी दिएका हुन् ।

पाण्डेका अनुसार कंलकीदेखि महाराजगञ्जसम्मको चक्रपथ सुधार आयोजना समयमै सम्पन्न नभएपछि कार्यालयमा जनगुनासो आएको थियो । जनगुनासो व्यवस्थापन गर्न तथा चक्रपथ सुधार आयोजना अस्तव्यस्त भएबाट महानगरवासीलाई पर्न गएको असुविधालाई सम्बोधन गर्ने उद्देश्यले कंलकीदेखि बसुन्धरासम्मका ९ स्थानमा काठमाडौं महानगरपालिकाले जनतालाई सुसूचित गर्न सूचना बोर्ड राखेको थियो ।

तर, ती सूचना बोर्डहरू अहिले राखिएको स्थानमा छैनन् । "...चोरी भएको सम्बन्धमा आवश्यक छानबिन/अनुसन्धान गरी दोषीउपर हदैसम्मको कारबाही गरी दिनुहुनु निर्देशानुसार अनुरोध गरिन्छ,” पाण्डेले उजुरीमा भनेका छन् ।