काठमाडौं । घरेलु मैदानमा जारी ट्वान्टी–२० क्रिकेट शृंखलाको दोस्रो खेलमा आयरल्यान्ड वुल्भ्सविरुद्ध नेपालका कुशल मल्लले एकै ओभरमा दुई विकेट लिएका छन् ।

मंगलबार कीर्तिपुरस्थित त्रिवि क्रिकेट मैदानमा जारी खेलमा नेपालले दिएको १९९ रनको लक्ष्य पछ्याइरहेको आयरल्यान्ड वुल्भ्सले १५.१ ओभरमा मोर्गन टोपीङ र सोही ओभरको पाँचौँ बलमा गाभिन होइलाई गुमाएको हो । कुशलले टोपीङलाई आसिफ सेखबाट स्टम्प गराउँदा होइलाई ‘कट एन्ड बोल्ड’ गरे ।

जारी खेलको १६ ओभर समाप्त हुँदा आयरल्यान्ड वुल्भ्सले ६ विकेट गुमाएर ११० रन बनाएको छ ।

त्यसअघि टस जितेर ब्याटिङमा आएको नेपालले निर्धारित २० ओभरमा सात विकेट गुमाएर १९८ रनको योगफल खडा गरेको थियो । शृंखलाको यो दोस्रो खेल हो । यसअघि पहिलो खेलमा नेपालले आयरल्यान्ड वुल्भ्सलाई ६ विकेटले हराएको थियो ।

नेपाल ‘ए’ ले आयरल्यान्ड वुल्भ्ससँग पाँच ट्वान्टी–२० र तीन एकदिवसीय खेलको शृंखला खेल्ने तालिका छ । जसअन्तर्गत सुरुका दुई ट्वान्टी–२० खेल रोहितकुमार पौडेलको नेपाली सिनियर टिमले खेल्दा बाँकी खेल भने विनोद भण्डारीको कप्तानीमा रहेको नेपाल ‘ए’ ले खेल्नेछ ।