काठमाडौं । नेकपा (एमाले)लाई समाजवादी मोर्चामा ल्याउने नेताहरूको प्रयास असफल भएको छ । शुक्रबार एमाले अध्यक्ष केपी शर्मा ओलीले मोर्चामा पार्टी सहभागी हुने हो भन्ने सञ्चारकर्मीको प्रश्नमा जवाफ दिए– होइन । 

समाजवादी मोर्चामा सहभागी हुन नेपाल कम्युनिस्ट पार्टीका महासचिव नेत्रविक्रम चन्दले बिहीबार ओलीसँग भेटवार्ता गरेका थिए । विप्लव अहिले मोर्चाका संयोजक समेत हुन् । 

शुक्रबार बिहान बालुवाटारमा बसेको मोर्चाको बैठकमा एमालेलाई सहभागी गराउने विषयमा छलफल भएको थियो । बैठकले ओलीसँग छलफल गर्ने जिम्मेवारी प्रधानमन्त्री पुष्पकमल दाहाल ‘प्रचण्ड’लाई दिएको थियो । सोही अनुसार शुक्रबार दिउँसो सिंहदरबामा भएको भेटवार्तामा प्रचण्डले बालुवाटार बैठकको निर्णयबारे ओलीलाई जानकारी गराएका थिए । 

सिंहदरबारबाट निस्कने क्रममा ओलीले समाजवादी मोर्चामा सहभागी नहुने बताएका हुन् । ओलीको यो प्रतिक्रियासँगै एमालेलाई समाजवादी मोर्चामा सहभागी गराउने प्रयास असफल भएको नेताहरू बताउँछन् । 

मोर्चामा नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी र नेपाल कम्युनिस्ट पार्टी रहेका छन् । गएको असार ४ गते मोर्चाको घोषणा भएको थियो । मोर्चा घोषणा हुँदा एमाले प्रतिपक्षमा थियो । माओवादी र एकीकृत समाजवादी तत्कालीन नेपाली कांग्रेससहिको गठबन्धनमा थिए । 

अहिले एमाले सत्तारुढ भएकाले मोर्चामा आबद्ध हुनुपर्ने पक्षमा अरु दल छन् । माओवादीकी उपाध्यक्ष पम्फा भुसालले समाजवादी मोर्चा एमाले नआए पनि कायम रहने बताएकी छन् । शुक्रबार नै न्युज एजेन्सीसँगको कुराकानीमा उनले वामपन्थी दल र समाजवादी हुनुको नाताले समाजवादी मोर्चामा एमाले पनि आउनु राम्रो हुने बताइन् । 

समाजवादी मोर्चा विगतमै बनेको उल्लेख गर्दै अहिले सत्ता समीकरण फेरिँदा एमाले पनि सरकारमा रहेका कारण समाजवादी मोर्चाप्रति एमाले भ्रमित हुन नहुने उनको भनाइ छ । एमाले मोर्चामा नआए पनि आपसी असमझदारी हुन नहुनेमा उनले जोड दिइन् ।