काठमाडौं । उद्योग, वाणिज्य तथा आपूर्तिमन्त्री दामोदर भण्डारीले नेपाली सिमेन्ट मुलुकभित्रै अधिकतम प्रयोग गर्ने बाटोमा सरकार अघि बढेको बताएका छन् । 

बिहीबार सिंहदरबारमा बसेको उद्योग तथा वाणिज्य र श्रम तथा उपभोक्ता हित समितिको बैठकमा बोल्दै उनले नेपालमा उत्पादित सिमेन्ट निर्यातलाई अझै व्यवस्थित गर्दै जाने प्रतिबद्धता व्यक्त गरे । 

"राज्यका उद्योगहरू धरासायी हुनुपर्ने कारण थिएन । तर, व्यवस्थापकीय पक्षका बारेमा तपाईं हामी सबैले बुझेका छौँ । यसलाई चलाउनुपर्नेछ । सिमेन्टमा आत्मनिर्भर छ । अहिले यसका अतिरिक्त अरु थुप्रै उद्योगहरूलाई पनि चलाउनुपर्नेछ ।निर्यातको प्रमुख आधार सिमेन्टलाई बनाउनुपर्छ, निजी क्षेत्रले पनि यो नियति भोग्न नपरोस्," मन्त्री भण्डारीले भने । 

उनले गत आर्थिक वर्षको बजेटमा पनि नेपालमा उत्पादित सिमेन्टलाई प्रोत्साहन गर्ने नीति लिइएको बताए । “निर्माण पूर्वाधारमा डिजेल किनेर प्रयोग गर्नुको सट्टा सिमेन्टको प्रयोग बढाउन आवश्यक छ,” मन्त्री भण्डारीले भने, “अहिलेको व्यापार असन्तुलन र आयातमुखी व्यापार घाटाका चाङहरूलाई हटाउनुपर्ने आवश्यकता छ । व्यापार सन्तुलनका लागि सिमेन्ट क्षेत्र आवश्यक छ ।” 

उनले सञ्चालनमा रहेका उद्योगलाई नाफामा ल्याउन र पूर्ण सञ्चालन गर्न आवश्यक रहेको बताए । नेपाली कच्चा पदार्थमा आधारित उद्योगहरू मुनाफामा चल्न नसकेको स्वीकार गरे ।