काठमाडौं । श्री एयरलाइन्सको धनगढी उडानका क्रम गम्भीर लापरबाही भएको भेटिएको छ । नाइन एन एएनएस कल साइनको श्री एयरलाइन्सको फ्लाइट नम्बर २२७ को जहाजको धनगढी एयरपोर्टमा ‘नोज गियर’ (चक्का) फुत्किएको थियो ।

जहाज सोमबार राति करिब ८ बजेतिर धनगढी एयरपोर्टमा अवतरण गरेको थियो । अवतरणलगत्तै जहाज पार्किङ वेमा लगेर यात्रु झारियो ।

यात्रु झारेपछि पाइलटलाई जहाजमा कुनै खराबी रहेको लागे चेकजाँच गरेका थिए । त्यसपछि जहाज चेक गर्दा एउटा नोज गियर नै नभएको पाइयो । पछि खोज्दै जाँदा ‘नोज गियर’ रनवे र ट्याक्सी वेको टर्निङ पोइन्टको चौरमा फेला परेको थियो ।

त्यसै घटनालाई लिएर नागरिक उड्डयन प्राधिकरणले जहाज उडानभन्दा अगाडि मर्मतमा सहभागी दुईजना इन्जिनियरलाई ग्राउन्डेड गरेको छ ।

साथै, प्राधिकरणले सात दिनभित्र सबै जहाजको रिपोर्ट बुझाउन पनि निर्देशन दिएको प्राधिकरणका प्रवक्ता जगन्नाथ निरौलाले बताए ।

“श्री एयरलाइन्सको सबै जहाजको डिटेल चेक गरेर एक हप्ताभित्र रिपोर्ट बुझाउन भनेका छौँ । अहिले उडान अगाडि मर्मतमा सहभागी दुई इन्जिनियरलाई ग्राउन्डेड गरेका छौँ ।”