काठमाडौं । नेपाल समाजवादी पार्टीका सहअध्यक्ष गंगानारायण श्रेष्ठले आफूहरूको सिंगो पार्टी नेकपा (माओवादी केन्द्र)सँग एकता गर्न लागेको बताएका छन् । शनिबार न्युज एजेन्सी नेपालसँग उनले सिंगो नेपाल समाजवादी पार्टी नै माओवादी केन्द्रसँग एकता गर्न लागेको जिकिर गरेका हुन् ।

उनले कुनै एक पक्ष मात्र एकता गर्न लागेको भन्ने विषय सत्य नभएको तर्क गरे । नेसपाले गएको मंसिर ६ गते नै केन्द्रीय समिति बैठकबाट पार्टी एकता गर्न संयोजन समिति बनाएको उनले उल्लेख गरे । सोही समितिको बैठक बसेर एकता गर्ने निर्णय गरिएको उनले जानकारी दिए ।

उनले दुई पार्टीका बीचमा एकता गर्ने भनेर चुनावअघि नै सहमति भएको बताए । पार्टी एकताको सर्तसहित आफूहरूले माओवादी केन्द्रको चुनाव चिह्नबाट निर्वाचनमा प्रतिस्पर्धा गरेको उनले सुनाए ।

उनले आफूहरू पार्टी एकता गर्ने डेढ वर्षअघिको सहमतिअनुरूप अगाडि बढेको बताए । चाँडोभन्दा चाँडो पार्टी एकता हुने उनको भनाइ छ ।

न्युज एजेन्सी नेपालसँग गंगानारायण श्रेष्ठले व्यक्त गरेको भनाइ पढ्नोस्–

अहिले त हामीले नेपाल समाजवादी पार्टी र नेकपा (माओवादी केन्द्र)को पार्टी एकता संयोजन समितिको बैठक बसेको हो । यहाँ नेपाल समाजवादी पार्टीको फलानो गुटको बैठक बसेको त होइन नि । नेपाल समाजवादी पार्टीको बैठक बसेको हो । नेपाल समाजवादी पार्टीको बैठक बस्दै गर्दाखेरि नेपाल समाजवादी पार्टीमा फलाना अध्यक्षको पक्षमा कति, अर्का अध्यक्षको पक्षमा कति भन्ने प्रश्न होइन । यो त नेपाल समाजवादी पार्टीको एकता संयोजन समिति र नेकपा (माओवादी केन्द्र) एकता संयोजन समितिको बीचमा संयुक्त बैठक बसेको हो । त्यसो भएको हुनाले यहाँ अल्पमतको कुरा, बहुमतको कुरा, यो पक्ष, त्यो पक्ष होइन । नेपाल समाजवादी पार्टी । सिंगो नेपाल समाजवादी पार्टी एकतामा जाने हो । त्यो त हामीले मंसिरको ६ गते नै पार्टीको केन्द्रीय समितिको बैठकबाट पार्टी एकता संयोजन समिति बनाएका थियौँ । र, त्यो पार्टी एकता संयोजन समितिको बैठक विविध कारणले आजसम्म बस्न सकेको थिएन । आज बस्यो र यसले पार्टी एकता गर्ने निर्णय गर्‍यो । पार्टी एकता गर्ने भनेर हिजो चुनावभन्दा अगाडि नै हामी तयार भएको हो नि । विविध कारणले गर्दा पार्टी एकता गर्न सकेनौँ । र, पार्टी एकता गर्न नसकिसके पछाडि नेकपा (माओवादी केन्द्र)को गोलाकारभित्रको चुनाव चिह्न हामी नेपाल समाजवादी पार्टीको तर्फबाट पनि लिएर हामी चुनाव लडेको हो । त्यो त पार्टी एकता गर्ने सर्तसहित गरेको थियौँ नि त । हामी डेढ वर्षअगाडिको जुन सहमति हो, त्यो सहमतिअन्तर्गत नै अगाडि बढेका छौँ र आज त्यसलाई अझ ठोस, अझ मूर्त निर्णयमा पुर्‍याएका छौँ ।

हामीले अहिले चाहेर पनि नेपाल समाजवादी पार्टीको सांसद भनेर कानुनी रूपमा दाबी गर्ने ठाउँ रहँदैन । पार्टीगत हिसाबले नेपाल समाजवादी पार्टीको हामी नेता हौँ । तर, कानुनी हिसाबले, संसदीय दलमा आबद्ध भएको हिसाबले हामीले एकल चुनाव चिह्नमा चुनाव लडेको कारण नेपाल समाजवादी पार्टीको नभएर नेकपा (माओवादी केन्द्र)को संसदीय दलको सदस्य हौँ । हामी चुनाव जितेर माओवादी केन्द्रको संसदीय दलको सदस्य भइसके पछाडि महेन्द्रजी (महिन्द्र राय यादव) यहाँ मन्त्री हुनुभयो । अहिले पुनर्गठनमा पर्नु भएन । म आजको दिनसम्म वाग्मती प्रदेश सरकारको मन्त्री छु । हिजो हामीले यो मन्त्री पद लिँदाचाहिँ पदलोलुप नहुने, आज महेन्द्रजीको मन्त्री पद गइसक्यो । उहाँहरू (बाबुराम भट्टराई पक्षधर)ले भनेको मन्त्री पदको लागि हो भने त महेन्द्रजीको पद गइसक्यो । सबैभन्दा रिसाएर पार्टी एकता नगर्ने भनेर त उहाँ (महिन्द्र राय यादव)ले भन्नुपर्ने हो नि । त्यसकारणले व्यावहारिक रूपमै त्यो खण्डन भइसकेको छ । मेरो कुरा, अहिले मलाई मन्त्री बनाइदिएको कुरा त होइन । मैले मन्त्री पद जोगाइदेऊ बाबा भनेर म माओवादी केन्द्रसँग हारगुहार गर्न गएको त छैन । राजनीतिक ढंगले हामीले जुन निर्णय गर्‍यौँ नि पार्टी एकता गर्ने, त्यो निर्णयमा इमानदार भएर, प्रतिबद्ध रहेर हामी अगाडि आइराखेका छौँ । जो साथीहरूले यसो (सत्ताका लागि) भन्नुहुन्छ, उहाँ साथीहरूले पार्टी एकता चाहनु हुन्न । सत्य कुरा त्यो हो । दुई पार्टीसँगसँगै अरू पार्टीहरूलाई पनि एकताको निम्ति तयार गर्दै लैजानुपर्छ भनेर पनि हाम्रोबीचमा छलफल चलेको छ । तिथिमिति नै घोषणा गर्ने खालको अवस्था त नहोला । छिटोभन्दा छिटो पार्टी एकता टुंग्याउँछौँ ।