काठमाडौं । प्रमुख प्रतिपक्षी दल नेपाली कांग्रेसले गृहमन्त्री बनेका रवि लामिछाने सहकारी ठग भएको भन्दै आरोप लगाएको छ । बुधबारको प्रतिनिधिसभाको बैठकको सुरुआतमा बोल्दै सचेतक सुशिला थिङले सहकारी प्रकरणमा मुछिएको जान्दाजान्दै प्रधानमन्त्री पुष्पकमल दाहाल ‘प्रचण्ड’ले रास्वपा सभापतिलाई मन्त्री बनाएको आरोप लगाइन् ।
उनले प्रधानमन्त्रीले गर्छु भनेको उथलपुथल यही हो भन्दै प्रश्न गरिन् । “उथलपुथल गरेर राम्रो कुरा ल्याउनुभएछ । सहकारी ठगीमा जोडिएका र अनुसन्धानमा रहेकालाई गृहमन्त्री बनाएर ल्याउनुभएछ,” उनले भनिन् ।
उनले आफैँले अनुसन्धान गरिरहेको मुद्दामा गृहमन्त्रीलाई प्रहरीले कसरी सलुट गर्छ र अनुसन्धान कसरी अघि बढ्छ भन्दै प्रश्न गरिन् । “आफने मुद्दामा आफैँलाई दोषी ठहर गर भन्दै अनुसन्धान होला कि नहोला ?,” उनको प्रश्न थियो ।
साथै उनले पूर्वउपपराष्ट्रपति नन्दबहादुर पुनसहित सचिवालय सुन कान्डमा जोडिएको अनुसन्धान कसरी अघि बढ्छ भन्दै प्रश्न गरिन् । यस्ता विषयमा प्रस्ट नभए सदन सहजै सञ्चालन हुन कांग्रेसले नदिने उनले चेतावनी दिइन् ।
