काठमाडौं । नेकपा (एकीकृत समाजवादी)का अध्यक्ष माधवकुमार नेपालले संसदीय दलको बैठकबाटै प्रधानमन्त्री पुष्पकमल दाहाल ‘प्रचण्ड’लाई फोन गरेका छन् ।

सोमबार सिंहदरबारस्थित संसदीय दलको बैठकमा सांसदहरूले पूर्वनिर्धारित सम्झौता कार्यान्वयन नभएको भन्दै असन्तुष्टि जनाएपछि नेपालले प्रचण्डलाई फोन गरेका हुन् । प्रचण्डले गठबन्धन छोड्दा सल्लाह नै नगरेको, धोका दिएको भन्दै पहिले गरिएका सम्झौता कार्यान्वयन हुनुपर्ने माग सांसदहरूले राखेका थिए ।

प्रधानमन्त्रीले सम्झौता कार्यान्वयनको लिखित सम्झौता गरे मात्रै राष्ट्रियसभाको अध्यक्ष र विश्वासको मत दिनुपर्ने दबाब आएपछि अध्यक्षले बैठकबाटै प्रधानमन्त्रीलाई फोन गरेको पार्टीका प्रमुख सचेतक मेटमणि चौधरीले जानकारी दिए ।

“प्रधानमन्त्रीबाट पहिले भएका सहमति कार्यान्वयन भएनन् । अब हुने कुरामा लिखित हुनुपर्छ भनेर दबाब बढेको थियो । अध्यक्षले बैठकबाट प्रधानमन्त्रीलाई फोन गर्नुभयो । उहाँले पहिले भएका सहमति कार्यान्वयन नभए राष्ट्रियसभाको अध्यक्ष र विश्वासको पक्षमा जान नसक्ने जानकारी गराउनुभयो,” उनले बाह्रखरीसँग भने ।

एकीकृत समाजवादीले प्रदेशमा मुख्यमन्त्री पाउनुपर्ने माग राखेको छ । त्यस्तै, प्रदेशका मन्त्री, प्रदेश प्रमुखको नियुक्तिका विषयमा पनि अहिले नै सहमति गर्नुपर्ने पक्षमा सांसदहरू देखिएका छन् ।