काठमाडौं । बैंक तथा वित्तीय संस्थामा एकैदिन पाँच अर्ब रुपैयाँ निक्षेप थपिएको छ । नेपाल राष्ट्र बैंकका अनुसार फागुन १८ गते एकैदिन पाँच अर्ब रुपैयाँ निक्षेप थपिएको हो । फागुन १७ गते बिहीबारसम्म ६१ खर्ब ६३ अर्ब रुपैयाँ रहेको निक्षेप एकैदिनमा बढेर ६१ खर्ब ६८ अर्ब रुपैयाँ पुगेको हो ।

कर्जा लगानी भने एक अर्बले घटेको छ । फागुन १७ गतेसम्म ५० खर्ब ८७ अर्ब रुपैयाँ कर्जा लगानी भएकोमा १८ गते घटेर ५० खर्ब ८६ अर्ब रुपैयाँ कायम भएको छ ।

पछिल्ला दिनहरूमा बैंकप्रति लक्षित गतिविधिले कर्जा लगानी विस्तारमा सुस्तता आएको बैंकरहरू नै बताउँछन् । नेपाल राष्ट्र बैंकका अनुसार चालु आर्थिक वर्षको साउन १ देखि फागुन १५ गतेसम्म निक्षेप ६.८ प्रतिशतले वृद्धि भएको छ । त्यस्तै, कर्जा लगानी भने ४.२ प्रतिशतले वृद्धि भएको छ ।

गत शुक्रबारसम्म कर्जा–निक्षेप अनुपात (सीडी रेसियो) ८०.१२ कायम छ । तर, राष्ट्र बैंकले बैंकहरूलाई सीडी रेसियो ९० प्रतिशत कायम गर्न सक्ने निर्देशन दिएको छ । अहिले बैंकहरू कर्जा लगानी गर्ने अवस्थामा नभएको बैंकरहरू नै बताउँछन् । पुँजीकोष दबाबले पनि अहिले बैंकहरू समस्यामा छन् ।