उदयपुर । कोसी प्रदेशका मुख्यमन्त्री केदार कार्कीको ‘हात्तीमैत्री पदयात्रा’ मंगलबार उदयपुरको बेलसोत आइपुगेर सम्पन्न भएको छ । यही फागुन ९ गते झापाको बाहुनडाँगीबाट पदयात्रा थालिएको थियो ।

यसक्रममा मुख्यमन्त्री कार्कीले पाँच जिल्लामा २४३ किलोमिटर पैदलयात्रा गरे । उनले पाँच जिल्लाका २४ स्थानीय तह, ५६ सामुदायिक र चार साझेदारी वनक्षेत्र हुँदै पदयात्रा गरेका थिए । यसक्रममा कार्कीले दैनिक ४० किलोमिटर पैदलयात्रा गरे ।

मुख्यमन्त्रीले पीडित र सर्वसाधारणसँग प्रत्यक्ष अन्तरसंवाद गरी जानकारी लिएको विषयलाई संश्लेषण र कार्ययोजना तय गरिने प्रदेशको पर्यटन, वन तथा वातावरण मन्त्रालयका सचिव विशाल घिमिरेले जानकारी दिए ।

जंगली हात्तीको परम्परागत जैविकमार्गमा गरिएको यो यात्रा मानव–हात्तीबीचको द्वन्द्वको कारण पहिचान र समस्या निराकरणमा केन्द्रित रहेको मुख्यमन्त्री कार्कीले बताए ।

जनसंख्या वृद्धि र मानवीय विकासको आवश्यकताको चापले हात्तीको जैविकमार्गको संकुचन र प्राकृतिक वासस्थान घटेको यात्राका क्रममा देखेको र यो विषयलाई बजेटमार्फत सम्बोधन गरिने उनले उल्लेख गरे ।

कोसी प्रदेशका पाँच जिल्लामा हात्तीले घरगोठ, खेतबारी र अन्नबाली विनाश गर्ने र मानवीय क्षति पुर्‍याउँदै आएको छ ।

पदयात्रा समापन कार्यक्रममा हात्तीविज्ञ रमेश थापा, शंकर लुइँटेल, संघीय सरकारका सचिव दीपक खराल र अभियानकर्मी बालकृष्ण कार्कीलाई सम्मान गरियो ।