काठमाडौं । नेपाली कांग्रेसको नेपाल विद्यार्थी संघ (नेविसंघ)का अध्यक्ष दुजाङ शेर्पाले जिम्मेवारी सम्हालेको दुई वर्षपछि केन्द्रीय समितिको पहिलो बैठक आह्वान गरे । मंगलबार (आज)का निम्ति बैठक बोलाइएको थियो । तर, संस्थापनइतर पक्षले सहभागी नहुने बताएपछि शेर्पा समस्यामा परे ।

पार्टी सभापति शेरबहादुर देउवाको निवासमै पुगेर संस्थापनइतरका विद्यार्थीले ध्यानाकर्षण गराए । देउवाले विवाद मिलाएर मात्र केन्द्रीय समिति बैठक बस्न निर्देशन दिएका छन् ।

आज बिहान ११ बजेका निम्ति निर्धारित बैठक सभापतिको निर्देशनपछि अध्यक्ष शेर्पाले दिउँसो १ बजे बस्ने तय गरेका छन् । त्यति बेला पनि बैठक बस्ने निश्चित छैन ।

देउवाको निर्देशनपछि शेर्पाले इतर समूहका विद्यार्थीलाई वार्तामा बोलाएका छन् । तर, मंगलबार मध्याह्न १२ बजेसम्म वार्ता सुरु नभएको नेता शेखर कोइरालानिकट केन्द्रीय सदस्य प्रेमिका रानामगरले जानकारी दिइन् ।

उनका अनुसार, वार्ता गर्न पहिला टोली तयार हुनुपर्ने भएकाले उनीहरू त्यसको गृहकार्यमा छन् ।

अध्यक्ष शेर्पाले वार्ताका निम्ति तयारी भइरहेको बताए । “वार्ता हुँदै छ, १ बजे बैठक (केन्द्रीय समिति) बस्छ,” शेर्पाले बाह्रखरीसँग भने, “सभापतिज्यूले मिलाएर बैठक बस्न भनेपछि १ बजेका लागि सारिएको हो ।”

देउवाले ०७८ चैत ९ गते शेर्पालाई ६ महिनाभित्र महाधिवेशन गर्ने गरी नेविसंघ अध्यक्ष बनाएका थिए । उनले डेढ वर्षसम्म कार्यसमिति नै पाएनन् । तदर्थ समिति बनाएको पाँच महिनापछि उनले केन्द्रीय समिति बैठक आह्वान गरेका हुन् ।

तदर्थ समिति बनाएपछि बैठक नराखेका शेर्पाले कांग्रेसका जिल्ला सभापतिसँग समेत परामर्श नगरी नेविसंघ जिल्ला अध्यक्ष तोकेपछि विवादमा तानिए । अध्यक्ष शेर्पाले काठमाडौं, धादिङ, दोलखा, मकवानपुर, बारा, नवलपरासी र सुनसरी जिल्ला अध्यक्ष एकलौटी तोकेपछि संस्थापनइतरले आपत्ति जनाएको थियो ।