काठमाडौं । सभामुख देवराज घिमिरेले संघीय संसद् भवनको परिसरमा लघुवित्त ऋणीहरू प्रवेश गरेको विषयमा आफूले गम्भीर चासो लिएको बताएका छन् ।

सभामुख घिमिरले आज साँझ उपप्रधान एवं गृहमन्त्री नारायणकाजी श्रेष्ठ र प्रहरी महानिरीक्षक वसन्तबहादुर कुँवरबाट घटनाबारे जानकारी लिएको उनको सचिवालयले जनाएको छ । उनले सुरक्षा व्यवस्थापनबारे आफू गम्भीर र चिन्तित भएको बताएका छन् ।

सभामुखको सचिवालयका अनुसार गृहमन्त्रीले सुरक्षा अधिकारीहरूको आकस्मिक बैठक बोलाइएको र छानबिन प्रक्रिया अगाडि बढाएको जानकारी दिएका छन् ।

प्रहरी महानिरीक्षक कुँवरले घटनालगत्तै तीन सदस्यीय छानबिन समिति गठन गरेको जानकारी दिएका छन् ।

उनले एसएसपी दिनेशराज मैनालीको नेतृत्वमा एसपी नवराज अधिकारी र डीएसपी दिनेश घिमिरे रहेको समिति गठन गरिएको र संसद् भवन सुरक्षार्थ टोली परिवर्तन गरिएको जानकारी दिए ।

उच्च सुरक्षाका बाबजुद आज दिउँसो लघुवित्त पीडितहरू नयाँ बानेश्वरस्थित संसद् भवन छिरेका थिए । संसद् भवनको चारैतिर तैनाथ गरिएको सुरक्षा घेरा तोडेर उनीहरू भित्र छिरेका थिए ।