काठमाडौं । संस्कृति, पर्यटन तथा नागरिक उडड्यनमन्त्री सुदन किरातीले प्रमुख दलका नेताहरूलाई मिलेर मुलुकमा सुशासन कायम गर्न आग्रह गरेका छन् । अग्रज नेताहरूले मिलेर मुलुकमा सुशासन कायम र गरिबीको अन्त्य तत्काल नगरे इतिहासले उनीहरूलाई माफी नदिने उनको निष्कर्ष छ ।

शनिबार काठमाडौंमा आयोजित डा. पुरण राईका कृतिहरू विमोचन कार्यक्रममा मन्त्री किरातीले नेताहरूले मिलेरै राजतन्त्र फालेको र निरंकुशताको अन्त्य गरेको स्मरण गरे । अब सुशासन र गरिबी निवारणको  पाटोमा काम गर्नुपर्ने आवश्यकता उनले औँल्याए ।

“...तपाईंहरू मिलेर नै एकचोटि सुशासन कायम गरिदिनुस् । गरिबीको अन्त्य गरिदिनुस् । तपाईंहरूलाई कति हामीले बोक्नुपर्ने, हनुमानले पहाड बोकेजस्तो हामी बोक्न तयार नै छौँ । तर, अब पनि ढिलो भयो भनेचाहिँ समयले हामी कसैलाई पर्खने छैन । र, माफी इतिहासले दिने छैन ।”

उनले मुलुकमा सुशासन र गरिबीको पक्षमा काम गर्न आफूहरूले अग्रज नेताहरूलाई सक्दो साथ दिने प्रतिबद्धता समेत व्यक्त गरे । नेपाली माटोअनुकूलको सिद्धान्त र व्यवहार प्रदर्शन गर्नुको साटो नेताहरू पद र प्रतिष्ठामा लाग्दा मुलुक पछि परेको उनले दोहोर्‍याए ।

मन्त्री किरातीले नेपाली समाजमित्रै रहेको समाजवादको विकास गरेर अघि बढ्नुपर्ने बताए । न्युज एजेन्सी नेपाल