गोदावरी । नेपाली कांग्रेसका महामन्त्री विश्वप्रकाश शर्माले चीन र भारतसँग कूटनीतिक संवाद गरेर प्रयोगहीनजस्तै भएका दुई अन्तर्राष्ट्रिय विमानस्थल प्रयोगमा ल्याउनुपर्ने धारणा राखेका छन् । अर्बौँको ऋण लिएर बनाइएका पोखरा र गौतमबुद्ध अन्तर्राष्ट्रिय विमानस्थल प्रयोगविहीन बन्दा मुलुक आर्थिक भारमा फसेको उनको तर्क छ ।

ललितपुरको गोदावरीमा जारी पार्टीको महासमिति बैठकमा मंगलबार समसामयिक राजनीतिक प्रस्ताव प्रस्तुत गर्दै उनले सो कुरा उल्लेख गरेका हुन् । “अर्बौँको ऋण लिएर हामीले बनाएका दुई अन्तर्राष्ट्रिय विमानस्थल एक ढंगले प्रयोजनहीन अवस्थामा छन् । मुलुककको अर्थतन्त्रतले चुनौती सामना गरिरहेको बेला विमानस्थलहरूको यो अवस्था हाम्रा लागि बिल्कुलै सुखद छैन,” महामन्त्री शर्माले प्रतिवेदनमा लेखेका छन्, “यस्तो समयमा बलियो राजनीतिक र कूटनैतिक इच्छाशक्ति अपेक्षित छ । जसमार्फत उत्तर र दक्षिणका दुवै मित्रराष्ट्रसँग हामीले सार्थक व्यावसायिक संवाद गर्न सकौँ ।”

कांग्रेसबाट सरकारमा सहभागी केही मन्त्रीको कार्यसम्पादन भूमिकामाथि उनले प्रश्न समेत उठाएका छन् । पार्टीबाट सरकारमा सहभागी केही मन्त्रीले ‘बिल्कुलै’ प्रभावकारी भूमिका खेल्न नसकेको उनले उल्लेख गरेका छन् ।

तीनै तहमा पार्टीबाट सरकारमा रहेका प्रतिनिधिलाई जनअपेक्षाअनुसार काम गर्न महासमिति बैठकबाट निर्देशन दिनुपर्नेमा उनले जोड दिएका छन् । “जनअपेक्षाअनुसार सरकारको गति प्रभावकारी ढंगले अघि बढ्न नसकेको यथार्थ छ । कांग्रेसका केही मन्त्रीको कार्यसम्पादन सन्तोषजनक निश्चय छ । तर, केही मन्त्रीको भूमिका मन्त्रीका रूपमा प्रभावकारी बिल्कुलै देखिएको छैन,” प्रतिवेदनमा शर्माले लेखेका छन् ।

भ्रष्टाचार नियन्त्रण र राष्ट्रिय सदाचार पद्धति स्थापनाको संकल्पमा कांग्रेस लाग्नुपर्ने उनले औँल्याएका छन् । महासमिति बैठकबाट १५ वर्षे नीति, विधि र थितिको जग बसाल्ने आधार तयार पार्नुपर्ने पनि उनले उल्लेख गरेका छन् ।

विश्वप्रकाश शर्माको प्रस्तावको पूर्णपाठ पढ्नोस्–