काठमाडौं । नेपाल, नामिबिया र नेदरल्यान्ड्स सम्मिलित आईसीसी पुरुष क्रिकेट विश्वकप लिग–२ का खेल बिहीबारदेखि हुँदैछन् ।  

त्रिवि क्रिकेट मैदान कीर्तिपुरमा हुने त्रिदेशीय खेल डिशहोमको ‘एक्सन स्पोर्टस एचडी’ले प्रसारण गर्ने भएको छ ।

हालै सम्पन्न नेपाल र क्यानडाबीचको द्धिपक्षीय सिरिज पनि एक्सन स्पोर्टस एचडीले प्रत्यक्ष प्रसारण गरेको थियो ।

लिग–२ अन्तर्गत तीनै टोलीले एकअर्कासँग दुई–दुई खेल खेल्नेछन् । एक्सन स्पोर्टसको युट्युब च्यानल र डिशहोस गो एपबाट पनि खेल प्रत्यक्ष प्रसारण हुने कम्पनीले जनाएको छ । लिग–२ को पहिलो खेल बिहीबार नेपाल र नामिबियाबीच हुँदैछ । 

फेब्रुअरी १७ मा नेपाल र नेदरल्यान्ड्स, फेब्रुअरी १९ मा नामिबिया र नेदरल्यान्ड्स, फेब्रुअरी २१ मा नेपाल र नामिबिया, फेब्रुअरी २३ मा नामिबिया र नेदरल्यान्ड्स तथा फेब्रुअरी २५ मा अन्तिम खेल नेपाल र नेदरल्यान्ड्सबीचको खेल हुनेछ । सबै खेल बिहान सवा ९ बजेदेखि सुरु हुनेछ । 

लिग–२ मा नेपाल, नामिबिया, नेदरल्यान्ड्ससहित क्यानडा, ओमान, स्कटल्यान्ड, संयुक्त अरब इमिरेट्स, अमेरिका पनि छन् । लिग–२ मा हरेक टोलीले ३६ खेल खेल्नेछन् । 

यो सिरिज डिशहोमको एक्सन स्पोर्टस एचडी र डिस होम गो एपमा हेर्न पाइने कम्पनीले जनाएको छ ।

तीन वर्षसम्म चल्ने लिग–२ का शीर्ष चार टोलीले सिधैँ विश्वकप छनोट खेल्न पाउनेछ । पुछारका चार टोलीले भने प्ले अफ खेल्नु पर्नेछ ।