काठमाडौं । बेलायतको लन्डनबाट विमानको टिकट र पासपोर्टबिना एक व्यक्ति अमेरिकाको न्यूयोर्क पुगेका छन् । 

बेलायती अखबार द सनका अनुसार क्रेग स्टर्ट नाम गरेका व्यक्तिले क्रिसमसको अघिल्लो दिन ब्रिटिस एयरवेजबाट न्यूयोर्कका लागि उडेका थिए ।

बेलायतको हिथ्रो एयरपोर्टमा ती व्यक्तिले कागजात नदेखाएरै सुरक्षा चेकपोइन्ट पार गरेको पाइएको छ ।

४६ वर्षीय ती पुरुष न्यूयोर्कको जेएफके एयरपोर्ट पुगेपछि रोकिएका थिए । त्यसपछि उनलाई बेलायत नै फिर्ता पठाइएको थियो ।

बेलायतमा ती पुरुषलाई पक्राउ गरी उड्डयन सुरक्षा ऐनअन्तर्गत ठगी र अपराधको आरोपमा मुद्दा लगाइएको छ । तर, उनी बेलायतमा फेरि गुमनाम भएको बताइएको छ । जनवरी २५ मा टेम्स भ्याली पुलिसले उनी हराएको सूचना निकालेको छ ।

घटनाबारे अनुसन्धान जारी रहेको बताइएको छ ।