शिवप्रसाद काफ्ले

चट्ट
सफा–सुकिलो भनिएको
सहरको बीचमा ठडिएको छ
करोडौँ खर्चेर बनाइएको
एउटा अग्लो भ्यु टावर
जति अग्लो भए पनि
टावरको टुप्पोबाट देखिने भनेको
त्यही
अस्तव्यस्त सहर
सहरका बीच अस्तव्यस्त सडक
ती ठूलाठूला खाल्डाखुल्डी नै रहेछ ।

त्यहाँ
सुशासनयुक्त समाज
भ्रष्टाचारमुक्त समाज
न्यायमूलक समाज
केही नदेखिँदो रहेछ
त्योभन्दा त
मैले मेरै पहाडको टुप्पोबाटै
अनेकन्
मनमोहक दृश्यहरू देख्न सक्छु ।
(देवदह–८, रुपन्देही)