काठमाडौं । सगरमाथा आरोहण गर्ने मानिसले अब आफ्नो दिसा आधार शिविर (बेस क्याम्प) हुँदै फिर्ता ल्याउनुपर्ने भएको छ ।

सगरमाथा हिमाल क्षेत्र पर्ने खुम्बु पासाङल्हामु गाउँपालिकाले यस्तो निर्देशन दिएको हो । 

आरोहणकर्ताले हिमाल क्षेत्रमा छोड्ने गरेको दिसा र अन्य किसिमको फोहोरले विश्वकै सर्वाेच्च शिखर सगरमाथा दुर्गन्धित हुँदै गएको छ ।

खुम्बु पासाङल्हामु गाउँपालिका अध्यक्ष मिङ्मा छिरि शेर्पाले बाह्रखरीसँग बोल्दै यस्तो निर्देशन दिएको बताए । 

आरोहणकर्तालाई आधार शिविरमा दिसा विर्सजनका लागि एउटा झोला दिइने र फर्कने बेला उक्त झोला फिर्ता ल्याए/नल्याएको चेकजाँच हुने अध्यक्ष शेर्पाले बताए । 

हिमालको तापक्रमका कारण मानिसले विर्सजन गरेको मलमूत्र लामो समयसम्म रहेर दुर्गन्धित हुने गरेको छ । जलवायु परिवर्तनले समेत हिमालयहरूको स्थितिबारे चिन्ता बढ्दै गएको छ ।

यस्तोमा विश्वकै सर्वाेच्च शिखरलाई सफा राख्ने प्रयास स्वरुप यो कदम चालिएको छ । अन्तर्राष्ट्रिय सञ्चारमाध्यममा विश्वभरकै मानिसहरूले यो कदमको स्वागत गरेका छन् ।