काठमाडौं । जनमत पार्टीका अध्यक्ष सीके राउतले नेपाल कागजी रूपमा स्वतन्त्र भएको उल्लेख गरेका छन् ।

यही माघ २१ गते पार्टीको बैठकमा उनले प्रस्तुत गरेको राजनीतिक प्रतिवेदनमा नेपालमा राजनीतिक र आर्थिक तथा महत्त्वपूर्ण निर्णय मात्र नभई गठबन्धन निर्माण र सरकार परिवर्तन बाह्य प्रभावमा हुने उल्लेख छ ।

उनले बाह्य प्रभावलाई झेल्न सक्ने राजनीतिक नेतृत्व तथा दलहरू नभएको आरोप पनि लगाएका छन् । “जसले बाह्यशक्तिको निर्देशनविपरीत निर्णय गर्छ, उसको सरकार त्यति नै खेर ढल्छ र अर्को पात्र खडा गरिन्छ,” उनले राजनीतिक प्रतिवेदनमा लेखेका छन् ।

अध्यक्ष राउतले यसबाट जोगिन एउटै उपाय भएको उल्लेख गरेका छन् । जनताबाट प्रत्यक्ष निर्वाचित कार्यकारी प्रधानमन्त्रीको व्यवस्थाले मात्र त्यस्तो स्थिति उत्पन्न नहुने उनको निष्कर्ष छ ।

प्रतिवेदनमा उनले नेपाल विकसित नहुनुमा राजनीतिको आड र शीर्ष नेताको संरक्षणमा मौलाएको बेथिति भएको पनि उल्लेख गरेका छन् ।

“जे भत्काए पनि हुने, यहाँसम्म कि हत्या–हिंसा गरे पनि हुने, मिलाउन सकिने खालको बेथिति छ । विद्यालयको शुल्क तिर्नु छ, आन्दोलन वा तोडफोड गरे तिर्नु पर्दैन । सवारीले सार्वजनिक सम्पत्तिमा तोडफोड भएको छ, जिम्मेवार हुनै पर्दैन,” उनले लेखेका छन् ।

प्रतिवेदनको पूर्णपाठ पढ्नोस्–