काठमाडौं । नेकपा (एमाले)का अध्यक्ष केपी शर्मा ओलीले संसदीय दलको बैठक दुई दिनका लागि आह्वान गरेका छन् । 

सचेतक महेश बर्तौलाले बैठक शनिबार र आइतबारका बस्ने जानकारी दिए । उनका अनुसार बैठक दुई दिन नै मध्याह्न १२ बजे बस्नेछ । बैठकमा आगामी संसद्‌मा खेल्ने भूमिकाबारे बृहत छलफल हुने उनले जानकारी दिए । 

“अबको संसद् कसरी प्रभावकारी बनाउने, संसद्‌मा सांसदले कस्तो भूमिका निर्वाह गर्ने भन्ने लगायतका विविध विषयमा छलफल गर्नुपर्ने भएकाले बैठक अलिक लामो राखिएको हो,” उनले बाह्रखरीसँग भने । 

संसद्को हिउँदे अधिवेशन यही माघ २२ गते दिउँसो ४ बजेका लागि आह्वान भएको छ । त्यसअघि एमालेको बैठक बस्न लागेको हो ।