काठमाडौं । विनोद भण्डारी र बसिर अहमेदको उत्कृष्ट साझेदारीप्रेरित त्रिभुवन आर्मी क्लबले प्रधानमन्त्री कप पुरुष राष्ट्रिय क्रिकेट प्रतियोगितामा कर्णाली प्रदेशविरुद्ध १६४ रनको फराकिलो जित निकालेको छ ।

आइतबार कीर्तिपुरस्थित त्रिवि क्रिकेट मैदानमा आर्मीले प्रस्तुत गरेको २८० रनको लक्ष्य पछ्याउने क्रममा कर्णालीले २९ ओभरमा सबै विकेट गुमाएर ११५ रन मात्र बनाउन सक्यो ।

आर्मीविरुद्ध कर्णालीका कुनै पनि ब्याटरले खुलेर खेल्न सकेनन् । कर्णालीबाट हिमान्सु शाहीले १९ रन बनाए । विपीन शाहीले १४, कप्तान रवीन्द्र शाही, निश्चल रावल र दीपेन्द्र रावतले समान १२ रन थपे ।

कर्णालीलाई सस्तैमा समेट्न आर्मीका विवेक यादव र कुशल मल्लले समान तीन विकेट लिए । सोमपाल कामीले दुई र साहब आलमले एक विकेट हात पारे ।

त्यसअघि, कप्तान विनोद र बसिरले शतकीय साझेदारी गरेपछि टस हारेर ब्याटिङमा उत्रिएको आर्मीले निर्धारित ५० ओभरमा पाँच विकेट गुमाएर २७९ रन बनाएको थियो ।

आर्मीबाट विनोदले शतक बनाए । उनले १३२ बलमा ६ चौका र तीन छक्का प्रहार गरे । जारी प्रतियोगितामा विनोदको यो दोस्रो शतक हो । ११०–५ को स्थितिबाट विनोदले बसिरसँग १६९ रनको साझेदारी गर्दै आर्मीलाई बलियो योगफलसम्म डोहोर्‍याएका थिए ।

विनोदसँग ब्याटिङमा जमेका बसिर भने दुई रनले शतक बनाउनबाट चुके । उनले ९२ बलमा १२ चौका र एक छक्कासहित अविजित ९८ रन बनाए । भीम सार्कीले २५, कुशल मल्लले २१ र सन्तोष कार्कीले ११ रन थपे ।

कर्णालीका दीपेन्द्र रावतले दुई विकेट लिए । दिवन पुन, प्रकाश जैसी र दिनेश अधिकारीले समान एक विकेट हात पारे ।

जितसँगै सात खेलबाट १० अंक जोडेको आर्मी तालिकाको चौथो स्थानमा उक्लिएको छ । आठ खेलबाट ६ अंकको कर्णाली सातौँ स्थानमा छ ।

मधेसले लुम्बिनीलाई हरायो
आइतबारै भएको अर्को खेलमा मधेस प्रदेशले लुम्बिनी प्रदेशविरुद्ध नौ रनको रोमाञ्चक जित निकाल्यो ।

मूलपानी क्रिकेट मैदानमा मधेसले प्रस्तुत गरेको १७० रनको लक्ष्य पछ्याउने क्रममा लुम्बिनीले ४०.५ ओभरमा सबै विकेट गुमाएर १६० रन मात्र बनाउन सक्यो ।

जितसँगै नौ खेलबाट १२ अंक जोडेको मधेस तेस्रो स्थानमा छ । सात खेलबाट दुई अंकको लुम्बिनी तालिकाको नवौँ स्थानमा छ ।