काठमाडौं । नेकपा (एकीकृत समाजवादी)को केन्द्रीय परिषद्का प्रतिनिधिलाई १० समूहमा विभाजन गरिएको छ । विधान संशोधनको प्रस्तावमाथि छलफलका निम्ति उनीहरूलाई १० समूहमा विभाजन गरिएको पार्टी सचिव जीवनराम श्रेष्ठले जानकारी दिए ।

सात प्रदेश र विशेष कमिटी गरी प्रतिनिधिलाई १० समूहमा विभाजन गरिएको छ । छलफलका लागि आज साँझसम्मको समय दिइएको महासचिव घनश्याम भुसालले बताए ।

उनका अनुसार, भोलि बिहान ११ बजे सुरु हुने बैठकमा समूहको निष्कर्ष सुनाइनेछ । बैठक भोलि नै सकाउने एकीकृत समाजवादीको तयारी छ ।

केन्द्रीय परिषद्को बैठकमा करिब ११ सय प्रतिनिधि सहभागी छन् । उनीहरूको खाजाको व्यवस्था पार्टी केन्द्रीय कमिटीले गरेको सचिव श्रेष्ठले जानकारी दिए । खाना र बस्ने व्यवस्था प्रतिनिधि आफैँले गरेको उनले बताए ।

पार्टीको अधिवेशनअघि अन्तरिम विधान, २०७८ लाई संशोधन गर्न लागिएको हो । केन्द्रीय परिषद्को बैठकले विधान संशोधन गर्नेछ ।