बजेटको सदुपयोग गर्न राष्ट्रपतिको सुझाव

देश

शनिबार, माघ १३, २०८०

काठमाडौँ । राष्ट्रपति रामचन्द्र पौडेलले आदिकवि भानुभक्त आचार्यको जन्मस्थल चुँदी रम्घालााई साहित्यिक तीर्थस्थल र गन्तव्यका रूपमा विकास गर्न प्राप्त बजेटको सदुपयोग गरी काम गर्नुपर्ने बताएका छन् ।

भानु नगरपालिकाका जनप्रतिनिधि एवं भानु साहित्य उद्यान समितिका पदाधिकारीसँग शनिबार शीतलनिवासमा भेट गर्दै उनले लोकतान्त्रिक, पारदर्शी र प्रभावकारी ढंगले गुरुयोजनाअनुरूप प्राप्त बजेटको सदुपयोग गर्न सुझाव दिएका हुन् ।

भानु जन्मस्थल र आदिकवि भानुभक्तको महत्त्व उजागर गर्ने गरी तदारुकताका साथ काम गर्न पनि उनले सुझाव दिए ।

भानु साहित्य उद्यानको प्रयोजनका निम्ति जग्गा प्राप्ति, गुरुयोजना निर्माण, साहित्यिक स्रष्टाको सालिक र साहित्य संस्कृति झल्कने संरचना बनाउन भानु नगरपालिकालाई केन्द्र सरकारले ससर्त पाँच करोड रुपैयाँ बजेट दिने निर्णय गरेको थियो ।