काठमाडौं । इस्लामिक तथा मुस्लिम बहुल देशहरूको संगठन इस्लामिक सहयोग संगठन (ओआईसी)ले भारतको अयोध्यामा गरिएको राम मन्दिरको प्राणप्रतिष्ठाको निन्दा गरेको छ । 

ओआईसीले मंगलबार विज्ञप्ति जारी गर्दै भारतीय सहर अयोध्यामा बाबरी मस्जिद ध्वस्त भएको ठाउँमा राम मन्दिर निर्माण र यसको पवित्रतालाई गम्भीर चिन्ताको विषय भएको बताएको छ ।

जनवरी २२ मा भारतीय प्रधानमन्त्री नरेन्द्र मोदीले अयोध्यामा बनेको नयाँ राम मन्दिरको उद्घाटन गरेका थिए । 

उद्घाटन कार्यक्रममा राजनीति र बलिउडका चर्चित अनुहारहरूका साथै आम मानिसहरूको ठूलो संख्यामा सहभागिता रहेको थियो ।

यस घटनाको ठीक एक दिनपछि, जनवरी २३ मा ओआईसीले मस्जिदको ठाउँमा राम मन्दिर निर्माण भएको र प्राणप्रतिष्ठा गरिएकोमा निन्दा गरेको हो ।

ओआईसीले विज्ञप्तिमा भनेको छ, “ओआईसी देशहरूको विदेशमन्त्री परिषद्को अघिल्लो बैठकहरूमा व्यक्त गरिएको अडान अनुरूप, हामी यी कदमहरूको निन्दा गर्दछौँ, जसले बाबरी मस्जिद जस्ता महत्त्वपूर्ण इस्लामिक स्थलहरूलाई ध्वस्त पार्ने उद्देश्य राख्दछ । बाबरी मस्जिद सोही ठाउँमा उभिएको थियो ।” बीबीसी