काठमाडौं । अफ्रिका कप अफ नेसन्समा आइभोरी कोस्टविरुद्ध नाइजेरियाले १–० को कठिन जित निकालेको छ ।

बिहीबार ओलम्पिक स्टेडियम अफ एबिम्पेमा घरेलु टिमविरुद्ध जित दिलाउन नाइजेरियाका ट्रुस्ट इकोंगले निर्णायक गोल गरे । इकोंगले ५५औँ मिनेटमा प्राप्त पेनाल्टी सदुपयोग गर्दै गोल गरेका थिए ।

जितसँगै चार अंक जोडेको नाइजेरिया समूह ‘ए’को दोस्रो स्थानमा उक्लिएको छ । समान खेलबाट तीन अंकको आइभोरी कोस्ट तालिकाको तेस्रो स्थानमा छ ।

बिहीबार नै भएको समूह ‘बी’को खेलमा साविक उपविजेता इजिप्ट र घानाले २–२ को बराबरी खेल्दै अंक बाँडे ।

इजिप्टका ओमार मर्मोस र मोस्तफा मोहमेदले गोल गरेका थिए । घानाका मोहमेद कुदुसले दुई गोल गरे । लगातार दुई बराबरी खेलेको इजिप्ट दुई अंकसहित तालिकाको दोस्रो स्थानमा छ । समान खेलबाट एक अंकको घाना पुछारमा छ ।