काठमाडौं । प्रधानमन्त्री कप पुरुष राष्ट्रिय क्रिकेट टिमका विभागीय टिम एपीएफ क्लब मधेस प्रदेशविरुद्ध पाँच विकेटले स्तब्ध बनेको छ । 

बिहीबार कीर्तिपुरस्थित त्रिवि क्रिकेट मैदानमा सम्पन्न खेलमा तीन ब्याटरले अर्धशतक बनाएपछि एपीएफले प्रस्तुत गरेको २४७ रनको लक्ष्य मधेसले ४८ ओभरमा पाँच विकेट गुमाएर पूरा गर्‍यो । मधेसको जितमा रुपेश सिंहले अविजित ७२ रन बनाए । उनले ७२ बलमा चार चौका र तीन छक्का प्रहार गरे । पवन सर्राफले चार चौका र पाँच छक्कासहित ६६ बलमा ६४ रन बनाए । 

यस्तै, निरज यादवले ७० बलमा तीन चौका र दुई छक्कासहित ५२ रन बनाए । यसबाहेक, अनिल साहले २९ र अभिषेक तिवारीले १३ रन बनाए । एपीएफका रमेश कुर्मी र कप्तान रोहितकुमार पौडेलले समान दुई विकेट लिए । त्यसअघि टस हारेर ब्याटिङमा आएको एपीएफले निर्धारित ५० ओभरमा नौ विकेट गुमाएर २४६ रनको योगफल खडा गरेको थियो । 

एपीएफका आसिफ सेखले ५९ रन बनाएका थिए । कप्तान रोहित पौडेल ५८ रन थपे । अमरसिंह रौटेलाले ४९ र सन्दीप जोराले २० रन जोडे । 

मधेसका रुपेश सिंह र प्रदीप पासवानले समान तीन विकेट लिए । रञ्जित कुमारले दुई र अर्निको यादवले एक विकेट लिए । जितसँगै चार खेलबाट दुई अंक जोडेको मधेश तालिकाको सातौँ स्थानमा उक्लिएको छ । तीन खेलबाट चार अंक जोडेको एपीएफ तालिकाको चौथो स्थानमा छ । 

बिहीबार नै सिद्धार्थनगरमा भएको खेलमा सुदूरपश्चिम प्रदेशले गण्डकी प्रदेशविरुद्ध १०८ रनको सहज जित निकालेको छ । सिद्धार्थ क्रिकेट मैदानमा सुदूरपश्चिमले प्रस्तुत गरेको २०२ रनको लक्ष्य पछ्याउने क्रममा गण्डकीले ३०.२ ओभरमा सबै विकेट गुमाएर ९३ रनमात्र बनाउन सक्यो । प्रतियोगितामा लगातार तेस्रो जित निकालेको सुदूरपश्चिम तालिकाको शीर्ष स्थानमा उक्लिएको छ । समान खेल खेल्दा पनि जितविहीन गण्डकी तालिकाको नवौँ स्थानमा छ ।