काठमाडौं । तान्जानियाविरुद्ध ३–० को सहज जित निकाल्दै उपाधि दाबेदार मोरक्कोले अफ्रिका कप अफ नेसन्समा विजयी सुरुआत गरेको छ । बुधबार आइभोरी कोस्टको स्टेड डी सान पेड्रोमा मोरक्कोलाई जित दिलाउन रोमेन साइस, अज्जेदिन ओनाही र युसुफ एन नेसिरीले गोल गरे ।

खेलको ३०औँ मिनेटमा साइसको गोलमार्फत मोरक्कोले अग्रता बनाएको थियो । मोरक्कोले दोस्रो हाफमा दुई गोल थप्यो ।

७०औँ मिनेटमा नोभाटस मिरोशीले दोहोरो पहेँलो कार्ड व्यहोर्दै मैदान छाडेपछि तान्जानिया १० खेलाडीमा समेटिएको थियो ।

७७औँ मिनेटमा ओनानीले टोलीको अग्रता दोब्बर बनाए । त्यसको तीन मिनेटपछि नै नेसिरीले गोल गर्दा मोरक्कोले ३–० को सहज जित निकाल्यो ।

जितसँगै तीन अंक जोडेको मोरक्को समूह ‘एफ’को शीर्ष स्थानमा उक्लिएको छ । पहिलो खेलमा पराजित तान्जेनिया तालिकाको पुछारमा छ । 

यही समूहको अर्को खेलमा डेमोक्रेटिक रिपब्लिक अफ कंगो र जाम्बिया १–१ को बराबरीमा रोकिए ।