काठमाडौं । नेपाल स्टक एक्सचेन्ज (नेप्से)को ४२औँ वार्षिक साधारणसभाबाट ६४ प्रतिशत नगद लाभांश पारित गरिएको छ । आइतबार सम्पन्न सभाले आर्थिक वर्ष २०७९÷८० सम्मको सञ्चित नाफाबाट चुक्ता पुँजीको ६४ प्रतिशत लाभांश दिने पस्ताव पारित गरेको हो ।

नेप्सेले नगद लाभांशबापत सेयरधनीलाई ६४ करोड रुपैयाँ वितरण गर्न लागेको हो । नेप्सेका सेयरधनी अर्थ मन्त्रालय, नेपाल राष्ट्र बैंक, कर्मचारी सञ्चय कोष, लक्ष्मी बैंक र प्रभु बैंक लिमिटेड हुन् ।

नेप्सेको ३१औँ वार्षिकोत्सव पनि आजै मनाइएको छ । वार्षिकोत्सवका अवसरमा नेप्सेका वरिष्ठ अधिकृत जगदीश रिजाल दीर्घ सेवा पदक तथा कदरपत्रद्वारा सम्मानित भएका छन् ।

यस्तै, ‘सुदृढ पुँजीबजारका लागि लगानीकर्ता साक्षरता’ शीर्षकमा आयोजित निबन्ध प्रतियोगिताका प्रथम, द्वितीय र तृतीयलाई पुरस्कार वितरण गरिएको छ । प्रथम हुने त्रिभुवन विश्वविद्यालय केन्द्रीय व्यवस्थापन विभागका सम्भव लाखेलाई ७५ हजार, द्वितीय हुने सरस्वती बहुमुखी क्याम्पसका गोविन्दकुमार सिंहलाई ५० हजार र तृतीय हुने त्रिभुवन विश्वविद्यालय केन्द्रीय व्यवस्थापन विभागका प्रविना सञ्जेललाई २५ हजार रुपैयाँ नगद पुरस्कार र प्रमाणपत्र प्रदान गरिएको नेप्सेले जानकारी गराएको छ ।