काठमाडौं । झापामा छैटौँ ‘राष्ट्रिय भक्का दिवस’ मनाइएको छ । आदिवासी कोच राजवंशी समुदायले पुस २९ गतेलाई भक्का दिवसका रूपमा मनाउँदै आएका छन् । 

चामलको पिठो (खासगरी कनिका)बाट बनाइने भक्का राजवंशी समुदायले चिसो मौसममा खाने प्रमुख परिकार हो । कोच राजवंशी समुदायको मौलिक परिकारका रूपमा रहेको भक्काको प्रवर्द्धन र संरक्षण गर्ने उद्देश्यले हरेक वर्ष पुस २९ गते भक्का दिवस मनाउने गरिएको राजवंशी समाज विकास समितिका अध्यक्ष अभय राजवंशीले बताए ।

राष्ट्रिय भक्का दिवस कार्यक्रममा राजवंशी समुदायले प्रयोग गर्ने वेशभूषा, गरगहना, परम्परागत सांस्कृतिक सामग्रीको प्रदर्शन र सांस्कृतिक कार्यक्रम समेत प्रस्तुत गरिएको थियो ।

भक्का दिवसका अवसरमा भद्रपुर नगरपालिका, कचनकवल र हल्दीबारी गाउँपालिकाले स्थानीयस्तरमा सार्वजनिक बिदा समेत दिएका छन् । पूर्वी तराई र विशेष गरी झापा, मोरङ, सुनसरीमा प्रचलित भए पनि अहिले काठमाडौंलगायत देशका विभिन्न स्थानमा पनि यसको लोकप्रियता बढ्दै गएको छ । हिमालयन टेली भ्वाइस