काठमाडौं । चालु आर्थिक वर्ष २०८०/०८१ को मंसिर मसान्तसम्म चालु खाता एक खर्ब ४० अर्ब २३ करोडले बचतमा रहेको छ । 

नेपाल राष्ट्र बैंकले बिहीबार सार्वजनिक गरेको ‘देशको वर्तमान आर्थिक तथा वित्तीय स्थिति’ प्रतिवेदनअनुसार चालु खाता बचतमा देखिएको हो । गत वर्षको सोही अवधिमा चालु खाता ४१ अर्ब २१ करोड रूपैयाँले घाटामा थियो । 

चालु खाता सन्तुलन भन्नाले के बुझिन्छ ? 
राष्ट्र बैंकका अनुसार निश्चित समयावधिभित्र आवासीय र गैरआवासीय व्यक्ति–संस्थाबीच भएका चालु प्रकृतिका आर्थिक कारोबारको सारांश नै चालु खाता सन्तुलन हो । चालु खाता घाटा वा बचतमा रहन सक्छ । 

चालु खाता घाटाले अन्य देशहरूबाट खुद सापटी लिइएको र चालु खाता बचतले अन्य देशहरूलाई खुद सापटी दिइएको भन्ने बुझिन्छ । चालु खाताअन्तर्गत वस्तु तथा सेवा व्यापार खाता, आम्दानी खाता र ट्रान्सफर खाता रहेका हुन्छन् ।