काठमाडौं । सन् २०२३ मा १६ लाखभन्दा बढी नेपाली विदेश गएका छन् । यो संख्या काठमाडौंको त्रिभुवन अन्तर्राष्ट्रिय विमानस्थल हुँदै विदेश जानेको हो ।

अध्यागमन विभागले सोमबार सार्वजनिक गरेको विवरणानुसार, गत वर्ष अर्थात् २०२३ जनवरी १ देखि डिसेम्बर ३१ सम्मको अवधिमा १६ लाख तीन हजार ८३६ नेपाली विदेश गएका छन् । यो अवधिमा विदेश जाने नेपालीमध्ये ११ लाख ७१ हजार १८६ पुरुष छन् । चार लाख ३२ हजार ५८४ महिला छन् ।

यसमा सबैभन्दा ठूलो संख्या वैदेशिक रोजगारीमा जानेको छ । २०२३ मा आठ लाख आठ हजार ४१५ नेपाली श्रम स्वीकृति लिएर वैदेशिक रोजगारीमा गएको विभागको तथ्यांकले देखाउँछ । वैदेशिक रोजगारीमा जानेमध्ये पुरुष सात लाख २३ हजार ७८९ र महिला ८४ हजार ६०४ छन् ।

वैदेशिक रोजगारपछि दोस्रो ठूलो संख्या भिजिट भिसामा जानेहरूको छ । २०२३ मा दुई लाख चार हजार ५१८ नेपाली भिजिट भिसामा विभिन्न देश गएका विभागले जनाएको छ । भिजिट भिसामा विदेश जाने नेपालीमा एक लाख ३० हजार ९२६ पुरुष र ७३ हजार ५७५ महिला छन् ।

यसमा तेस्रो ठूलो संख्या विदेशमा रहेका आफन्त/परिवार भेट्न जानेहरूको छ । २०२३ मा एक लाख ६७ हजार ४८५ नेपाली आफन्त/परिवार भेट्ने उद्देश्यले विदेश गएका छन् । आफन्त/परिवार भेट्न गएका मध्ये ७० हजार ८०८ पुरुष र ९६ हजार ६७७ महिला छन् ।

गत वर्ष अध्ययन गर्ने उद्देश्यले एक लाख आठ हजार ५४२ नेपाली विदेश गएका छन् । यीमध्ये ५९ हजार ९७८ पुरुष र ४८ हजार ५६२ महिला छन् ।

सोही अवधिमा अस्थायी आवासको उद्देश्यले विदेश जाने नेपालीको संख्या ९२ हजार ३४९ छ । यसरी जानेमा ५१ हजार ८७६ पुरुष र ४० हजार ४६८ महिला छन् ।

वर्ष २०२३ मा स्थायी बसोबासको उद्देश्यले विदेश जाने नेपालीको संख्या ७० हजार ९१५ छ । यीमध्ये ३६ हजार ६६३ पुरुष र ३४ हजार २५१ महिला छन् ।

सभा–सम्मेलन तथा तालिममा सहभागी हुने भन्दै गत वर्ष २४ हजार २६३ नेपाली विदेश गएको विभागले जारी गरेको विवरणमा देखिन्छ । यसरी विदेश जानेमा १७ हजार ३८४ पुरुष र ६ हजार ८७३ महिला छन् ।

डिपेन्डेन्ट भिसामा २०२३ मा २० हजार ६१३ नेपाली विदेश गएका छन् । डिपेन्डेन्ट भिसामा गएका मध्ये आठ हजार ८६ पुरुष र १२ हजार ५२७ महिला छन् ।

विभागले विदेश जाने नेपालीको उद्देश्यलाई १७ समूहमा वर्गीकरण गरेको छ । यीमध्ये आफन्त/परिवार भेट्न र डिपेन्डेन्ट भिसा दुई समूहमा मात्र विदेश गएका नेपालीमा पुरुषको तुलनामा महिलाको संख्या बढी छ । बाँकी १५ समूहमा विदेश गएकामा महिलाभन्दा पुरुषको संख्या बढी छ ।

२०२३ मा उपचार गराउने उद्देश्यले १० हजार ६९५ पुरुष र आठ हजार ८०९ महिला गरी १९ हजार ५०९ नेपाली विदेश गएको विभागको  तथ्यांकले देखाउँछ ।

गत वर्ष व्यापारको उद्देश्यले १९ हजार ५०९, संयुक्त राष्ट्रसंघका मिसनमा ६ हजार ५८, खेलकुदका कार्यक्रममा सहभागी हुने उद्देश्यले तीन हजार ६५३ र कन्सर्ट तथा सांस्कृतिक कार्यक्रममा सहभागी हुन एक हजार ९६४ नेपाली विदेश गएको विभागको तथ्यांकमा देखिन्छ ।