काठमाडौं । टाट पल्टिएको साउदी अरबको कम्पनी मोहम्मद अल–मोजिल ग्रुपले ५७१ नेपाली कामदारलाई आफ्नो तलब सुविधा लिन बोलाएको छ । कम्पनी टाट पल्टिएपछि मोहम्मद अल–मोजिल ग्रुपले कामदारलाई सेवा सुविधा नदिई बिदा गरेको थियो ।

अहिले सो ग्रुपले साउदीको रियादस्थित नेपाली दूतावासमार्फत तलब सुविधा लिन नेपाली कामदारलाई बोलाएको हो । मोहम्मद अल–मोजिल ग्रुपले कम्पनीबाट पाउनुपर्ने तलब सुविधा भुक्तानीमा सहजीकरण गरिदिन अनुरोधसहितको पत्र प्राप्त भएको रियादस्थित नेपाली दूतावासले जनाएको छ ।

नेपाली दूतावासले सम्बन्धित वेबसाइटमा गई आवश्यक विवरण भर्न तलब सुविधा लिन बाँकी रहेका नेपाली कामदारलाई अनुरोध गरेको छ ।

तलब सुविधा लिन बोलाइएका नेपाली कामदारको नामावली दूतावासले आफ्नो फेसबुक पेजमा प्रकाशित गरेको छ । “संलग्न सूचीमा रहेका व्यक्तिलाई चिन्नुभएको छ वा उहाँहरूसँग सम्पर्क छ भने कृपया यो सूचना समयमै उहाँहरूसम्म पुर्‍याई सहयोग गरिदिनुहुन समेत हार्दिक अनुरोध गरिन्छ,” दूतावासले भनेको छ ।