काठमाडौं । हिमालय एयरलाइन्सले काठमाडौं–ल्हासा–काठमाडौं उडान सुरु गरेको छ । बिहीबारदेखि उडान सुरु गरेको हो ।

यससँगै एयरलाइन्सले नेपाल र चीनबीचको कनेक्टिभिटी बढ्ने र द्विपक्षीय सम्बन्ध प्रवर्द्धन गर्न थप मद्दत हुने विश्वास व्यक्त गरेको छ ।

ल्हासा चीनको तिब्बत स्वायत्त क्षेत्रको राजधानी सहर हो ।

काठमाडौं–ल्हासा–काठमाडौं रुटले यात्रुहरूलाई नेपालको जीवन्त राजधानी सहर काठमाडौं र ऐतिहासिक रूपले समृद्ध एवम् रमणीय सहर ल्हासाका बीचमा सहज यात्राको विकल्प प्रदान गर्ने कम्पनीले जनाएको छ ।

हिमालय एयरलाइन्समा नेपाल र चीनको संयुक्त लगानी रहेको यस रुटमा पहिलो आउटबाउन्ड उडान एच९ ७७४ त्रिभुवन अन्तर्राष्ट्रिय विमानस्थलबाट स्थानीय समय अनुसार बिहान ८ बजेर ४० मिनेटमा प्रस्थान गर्ने र दिउँसो १२ बजे ल्हासा गोंगार विमानस्थलमा अवतरण गर्ने कार्यक्रम रहेको थियो ।

सन् २०२४ को जनवरी एकदेखि एयरलाइन्स्ले हरेक सोमबार यी दुई सहरबीच उडान सेवा सञ्चालन गर्ने बताएको छ ।