काठमाडौं । नेकपा (एकीकृत समाजवादी)को केन्द्रीय कमिटी बैठकमा केन्द्रीय सदस्यहरूले विधान संशोधनका विषयमा धारणा राखेका छन् । 

आज (बुधबार)देखि ललितपुरस्थित कान्तिपुर गार्डेनमा सुरु भएको बैठकमा विधान संशोधनबारे ११ वटा प्रश्नमाथि धारणा राख्न केन्द्रीय सदस्यहरूलाई भनिएको छ । सोहीअनुसार आजको बैठकमा १५ जना सदस्यले धारणा राखेको केन्द्रीय सचिव तथा कार्यालय सचिव जीवनराम श्रेष्ठले जानकारी दिए । 

उनका अनुसार एकजना केन्द्रीय सदस्यलाई तीन मिनेटको समय दिइएको छ । 

“विधान संशोधनको प्रश्नावलीमाथि केन्द्रीय सदस्यहरूले धारणा राख्नुभएको छ । आफ्ना सुझाव दिन एकजना केन्द्रीय सदस्यलाई तीन मिनेटको समय तोकेका छौँ । सकेसम्म सबैलाई बोल्न दिनेछौँ,” श्रेष्ठले बाह्रखरीलाई भने । 

एकीकृत समाजवादी महाधिवेशनको तयारीस्वरुप विधान संशोधनका लागि छलफल चलाएको हो । उसले महाधिवेशनका प्रतिनिधि, चुनिने कमिटीको संरचना, संख्या, उमेरहद लगायतका विषयमा छलफल गरेको हो । अर्को बैठक बिहीबार बिहान ११ बजे बस्ने श्रेष्ठले जनाए । 

• विधान संशोधन गर्न ११ प्रश्नको जवाफ खोज्दै एकीकृत समाजवादी (पूर्णपाठ)