काठमाडौं । ब्रिटिस अर्बपति सर जिम र्याटक्लिफ करिब १.३ बिलियन डलरमा इंग्लिस क्लब म्यानचेस्टर युनाइटेडको २५ प्रतिशत सेयर किन्न सहमत भएका छन् । 

र्याटक्लिफको इनेओस ग्रुपले युनाइटेडको फुटबल सञ्चालनको नियन्त्रण समेत राख्ने भएको हो । ७१ वर्षीय र्याटक्लिफले भविष्यमा युनाइटेडको मैदान ओल्ड ट्राफोर्डलाई समेत ३०० मिलियन डलर दिने सहमति बनेको छ । युनाइटेका मालिक ग्लाजर परिवारले पछिल्लो केही समययता ‘रणनीतिक विकल्पको खोजी’ गर्न सुरु गरे पनि १३ महिनापछि र्याटक्लिफसँग सहमति बनेको हो । 

अमेरिकी परिवार ग्लाजरले सन् २००५ मा युनाइटेडको स्वामित्व खरिद गरेका थिए । त्यसबेला ग्लाजर परिवारले युनाइटेडको स्वामित्व ७९० मिलियन पाउन्डमा किनेको थियो । यसअघि युनाइटेडको शतप्रतिशत सेयर किन्न कतारी बैंकर सेख जासिम बिन हमाद अल थानीले प्रस्ताव गरे पनि अक्टोबरमा उक्त प्रस्ताव फिर्ता लिएका थिए । 

सन् २०१३ मा प्रिमियर लिगको उपाधि जितेयता युनाइटेड इंग्लिस लिगमा संघर्षरत छ । क्लबले स्वभाविक लय गुमाउँदा ग्लाजर परिवारले नियमितजसो समर्थकबाट चर्को आलोचना र आन्दोलनको सामना गरिरहेका छन् । 

म्यानचेस्टरमा जन्मिएका र्याटक्लिफले आफू क्लबको ‘जीवनभरकै समर्थक’ रहेको बताए । र्याटक्लिफले गत वर्ष चेल्सीको स्वामित्व खरिद गर्न खोजे पनि असफल भएका थिए ।