काठमाडौं । चालु आर्थिक वर्ष २०८०/०८१ को पहिलो पाँच महिनामा नेपालको वैदेशिक व्यापार घाटा पाँच खर्ब ७९ अर्ब नाघेको छ ।
अघिल्लो आर्थिक वर्ष २०७९/०८० को पहिलो पाँच महिनामा नेपालको व्यापार घाटा पाँच खर्ब ९७ अर्ब ४४ करोड रुपैयाँ थियो ।
यो अवधिमा नेपालले ६ खर्ब ४२ अर्ब २० करोड रुपैयाँभन्दा बढीको वस्तु आयात गरेको छ ।
गत वर्षको तुलनामा यस वर्ष आयात ३.३९ प्रतिशतले घट्दा व्यापार घाटा पनि केही कम देखिएको छ ।
यस वर्ष नेपालले पहिलो पाँच महिनामा ६३ अर्ब २० करोड रुपैयाँको निर्यात गरेको छ ।
गत आर्थिक वर्षको यसै अवधिमा गरेको निर्यात ६७ अर्ब ३० करोड रुपैयाँभन्दा बढी थियो । निर्यातमा यस वर्ष ६.०९ प्रतिशतको गिरावट देखिएको छ ।
भन्सार विभागले आइतबार सार्वजनिक गरेको पाँच महिनाको वैदेशिक व्यापारको विवरणानुसार यो अवधिमा नेपालको कुल वैदेशिक व्यापार सात खर्ब पाँच अर्ब रुपैयाँ नाघेको छ ।
गत वर्षको यसै अवधिमा नेपालको वैदेशिक व्यापार सात खर्ब ३२ अर्ब रुपैयाँ भन्दा बढीको थियो ।
