काठमाडौं । प्रस्तावित न्यायाधीश शारंगा सुवेदीको संसदीय सुनुवाइ जारी छ । संसदीय सुनुवाइ समितिको बैठकमा सांसदहरूले उनलाई अगामी योजनाबारे प्रश्न गरिरहेका छन् । 

एमालेका प्रमुख सचेतक पदम गिरीले बाजेको पालाको मुद्दा नातिको पालामा लड्नुपर्ने अवस्थाको हल कसरी गर्ने सोच्नुभएको छ भनि प्रश्न गरे । उनले न्यायालय स्वच्छ छैन, विचौलिया छन् भन्ने विषयमा सुवेदीको धारणा सोधे । 

त्यस्तै, एमालेका सचेतक महेश बर्तौलाले न्यायिक विचलनका विषयमा उठेका जनधारणा कसरी कम गर्नुहुन्छ भनि प्रश्न गरे । “न्यायलयमा जनआशा डगमगाएको छ । न्यायिक विचलन छ । अदालत न्याय खरिद–बिक्री हुन्छ भन्ने छ, जनविश्वास घट्दो छ । जनमानसमा न्यायालयको धारणाप्रति कम गर्नुहुन्छ ?,” उनले सोधे । 

नेपाली कांग्रेसका सांसद जीवन परियारले मुद्दा लड्न नसक्नेहरूलाई कसरी सर्वसुलभ बनाउन सकिन्छ भन्ने प्रश्न गरे । एमालेकी सांसद ईश्वरी घर्तीले आरती साहको जस्तै फैसला आयो भने के गर्नुहुन्छ भनि प्रश्न गरिन् । 

“आरती साहको फैसला तपाईंले गर्नुभयो । तपाईंको फैसला उल्टियो, महिला, बालबालिकालाई प्राथमिकता भन्नुभयो । तर, उनको परिवारको जस्तै फैसला आयो भने के गर्नुहुन्छ ?,” उनको प्रश्न छ । 

कांग्रेसका रमेशजंग रायमाझीले आस्थाको केन्द्र भनिएको अदालतमा न्याय महँगो भएको बताए । जनता समाजवादी पार्टीका सांसद प्रकाश अधिकारीले पनि आरती साहको विषयमा विषयमा प्रश्न गरे । 

“आरती साहको मुद्दा सर्वोच्चबाट पुनरावलोकन भयो । ३३ किलो सुन कान्डमा पनि प्रश्न छ,” उनको प्रश्न छ, “मेडिकल काउन्सिलले सचेत गराएको छ भने यहाँलाई न्याय परिषद्ले पनि सचेत गराएको छ । यसलाई कसरी लिनुहुन्छ ?”