धादिङ । नेकपा (एमाले)को ‘झुलाघाट–चिवाभञ्ज्याङ समृद्धिका लागि संकल्पयात्रा’ वाग्मती प्रदेशमा प्रवेश गरेको छ ।

वाग्मती प्रदेश प्रवेशका क्रममा उक्त टोलीलाई आरुघाटमा भव्य स्वागत गरियो । टोलीलाई पार्टीका नेता तथा कार्यकर्ताले फूलमालाले स्वागत गरेका थिए । एमाले गण्डकी प्रदेशको टोलीले वाग्मतीको टोलीलाई झन्डा हस्तान्तरण गरी धादिङमा प्रदेश गराइएको हो ।

वाग्मती प्रदेशमा प्रवेश गर्नुअघि गोरखाको आरुघाटमा आयोजित सभालाई सम्बोधन गर्दै अध्यक्ष केपी शर्मा ओलीले पार्टीले सुरु गरेको यस यात्रा लोकतान्त्रिक आचरण र प्रणालीलाई बलियो बनाउनका निम्ति भएको बताए । राष्ट्रियता, सुशासन र समृद्धिका निम्ति अभियान प्रभावकारी भएको उनको भनाइ थियो ।

गण्डकीको गोरखा र वाग्मती प्रदेशको धादिङको सिमाना आरुघाट हुँदै सल्यानटार उक्लिएर शनिबार दिउँसो सो टोली नुवाकोटतर्फ लागेको थियो । नुवाकोट मध्यपहाडी राजमार्गको मध्यविन्दु हो । एक हजार ८७९ किलोमिटर लामो राजमार्गको आधा भाग नुवाकोटबाट पूर्व र आधा भाग पश्चिमतर्फ पर्छ ।

सो यात्रामा पार्टी अध्यक्ष ओलीसहित वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल, महासचिव शंकर पोखरेल, उपमहासचिव पृथ्वीसुब्बा गुरुङलगायत नेता छन् ।

एमालेको समृद्धिका निम्ति संकल्पयात्राअन्तर्गत सुदूरपश्चिम, कर्णाली र लुम्बिनी प्रदेशको यात्रा सकिइसकेको छ । यही मंसिर १४ गते मध्यपहाडी राजमार्गको पश्चिमी सुरुआती विन्दु बैतडीको झुलाघाटबाट सुरु गरिएको एमालेको यात्रा पूर्वी सीमाविन्दु पाँचथरको चिवाभञ्ज्याङमा पुगेर टुंगिनेछ । रासस