काठमाडौं । पछिल्लो समय केही व्यक्ति तथा समूहहरूले बैंक तथा वित्तीय संस्थाका कर्मचारीहरूप्रति लक्षित गरी दिइएको धम्कीपूर्ण अभिव्यक्ति, अराजक व्यवहार र आक्रमणको विरोध गरिएको छ । 

नेपाल बैंकर्स संघ, डेभलपमेन्ट बैंकर्स एसोसिएसन नेपाल र नेपाल वित्तीय संस्था संघले संयुक्तरूपमा विज्ञप्ति जारी गर्दै बैंकका शाखाका कर्मचारीलाई अभद्र व्यवहार भएको भन्दै यस्तो व्यवहार गर्नेलाई कारबाही गर्न पनि माग गरिएको छ ।

“एक वाणिज्य बैंकको विर्तामोड, झापा शाखामा कार्यरत एक कर्मचारीमाथि भएको धरपकडप्रति हाम्रो घोर आपत्ति रहेको र घटनामा संलग्न दोषीलाई कारबाहीको माग गर्दछौँ । आफ्ना ग्राहकहरूलाई सेवा–सुविधा प्रदान गर्न भूकम्प, कोभिडलगायत विषम परिस्थितिमा समेत अग्रपंक्तिमा खटिएर काम गर्ने कर्मचारीहरूमाथि यस प्रकारको दुर्व्यवहार अत्यन्त निन्दनीय छ । वित्तीय क्षेत्रमा कार्यरत कर्मचारीहरू भयरहित रूपमा काम गर्ने वातावरणको सुनिश्चितताका साथै सम्पूर्ण कर्मचारीहरूको सुरक्षाको प्रत्याभूति गराउन र दोषीलाई कारबाहीको दायरामा ल्याउन जिम्मेवार निकायसँग माग गर्दछौँ,’ विज्ञप्तिमा भनिएको छ । 

साथै, बैंकिङ जस्तो अत्यावश्यक एवं संवेदनशील क्षेत्रमा भइरहेको आक्रमणले समस्त बैंकिङ क्षेत्र नै चिन्तित र आतंकित बनेको भन्दै यस्ता गैरजिम्मेवार क्रियाकलापको आडमा जबरजस्ती कानुन आफ्नो हातमा लिइ भइरहेका अराजक घट्नालाई समयमैै नियन्त्रण गर्न राज्यका सम्बन्धित निकायहरूसँग अनुरोध गरिएको छ ।