![विपन्न नागरिक सहुलियत उपचार सेवा लिनेमा सबैभन्दा धेरै क्यान्सरका बिरामी](https://12khari.top/uploads/posts/sahuliyat-rog-1701827454.jpg)
काठमाडौं । सरकारले प्रदान गर्दै आएको विपन्न नागरिक औषधि उपचार कार्यक्रमअन्तर्गत पछिल्लो वर्ष सबैभन्दा धेरै क्यान्सरका बिरामीले सेवा लिएका छन् । स्वास्थ्य सेवा विभागका अनुसार आर्थिक वर्ष २०७९/८० मा २१ हजार ५५५ जना क्यान्सरका बिरामीले सो सेवा लिएका छन् ।
सहुलियतमा उपचार गरिने आठ रोगमध्ये सबैभन्दा कम अल्जाइमर्सका बिरामी ३५ जना छन् । हेमोडायलायसिस सेवा सात हजार ४४९, मुटुसम्बन्धि रोगमा ६ हजार ९३६, सीकलसेल एनिमियाका एक हजार ५६१, स्पाइनल इन्जुरीका एक हजार २३९, हेड एन्जुरीका ७६१, मिर्गौला प्रत्यारोपणका ४३२ र पार्किन्सन्सका ७९ जना बिरामीले सेवा लिएको विभागको तथ्यांक छ ।
उक्त आर्थिक वर्षमा ‘विपन्न नागरिक औषधि उपचार कार्यक्रम’मा सरकारले दुई अर्ब ४३ करोड ६९ लाख ४७ हजार रुपैयाँ खर्च गरेको स्वास्थ्य तथा जनसंख्या मन्त्रालयले जनाएको छ ।
कार्यक्रमअन्तर्गत सरकारले मुटु, क्यान्सर, मिर्गौला, अल्जाइमर्स, पार्किन्सन्स, स्पाइनल इन्जुरी, हेड इन्जुरी र सीकलसेल एनिमियाको उपचार खर्चमा सरकारले सहुलियत दिँदै आएको छ ।