काठमाडौं । चीनमा श्वासप्रश्वाससम्बन्धी रोगको नयाँ प्रकोप फैलिएको छ । चीनले कोभिड–१९ को महामारीका कारण अपनाएका स्वास्थ्यसम्बन्धी प्रतिबन्धका मापदण्ड यस वर्ष मात्रै हटाएको थियो ।

तीन वर्षअघि आएको महामारीसँग जुधेको चीनमा श्वासप्रश्वाससम्बन्धी संक्रमण फैलिएको बताइएको छ । 

पत्ता नलागेको यस्ता बिरामीको संख्या असामान्य रूपले बढेसँगै विश्व स्वास्थ्य संगठन (डब्ल्यूएचओ)ले प्रकोपबारे थप विवरण मागेको छ । अधिकारीले लकडाउन हटाएका कारण पनि संक्रमण बढेको हुनसक्ने आशंका गरेका छन् ।

नोभेम्बर १३ मा चीनको राष्ट्रिय स्वास्थ्य आयोग (एनएचसी)ले पत्रकार सम्मेलनमा श्वासप्रश्वाससम्बन्धी रोग बढेको बताएको थियो ।

नयाँ रोगहरूको निगरानी गर्ने कार्यक्रम (प्रोएमईडी)ले उत्तरी चीनमा बालबालिकामा थाहा हुन बाँकी एक किसिमको निमोनिया देखिएको बताएको छ ।

बेइजिङ र देशको उत्तरपूर्वी सहर लिओनिङमा पनि संक्रमण फैलिएको बताइएको छ ।

यसबीच डब्ल्यूएचओले चीनलाई बुधबार हालैको प्रकोपबारे प्रयोगशालामा गरिएको परीक्षणलगायत जानकारी सार्वजनिक गर्न आग्रह गरेको हो ।

कति बिरामी पुगे भन्ने विवरण नभए पनि बेइजिङको एक प्रमुख अस्पतालमा दैनिक एक हजार २०० बिरामी आपतकालीन कक्षमा आइरहेको बताइएको छ ।

संक्रमणका कारण विद्यालयमा विद्यार्थी नआउँदा एक हप्ता बिदा दिने स्थिति बनिरहेको अधिकारीहरूले बताएका छन् । 

संक्रमण १८ वर्ष मुनिका बालबालिका, वृद्ध र गर्भवती लगायतमा बढ्नसक्ने चिन्ता स्वास्थ्य अधिकारीहरूको छ ।