काठमाडौं । नेपाली राष्ट्रिय फुटबल टिमका मुख्य प्रशिक्षक भिन्चेन्सो अल्बर्टो एनेस अखिल नेपाल फुटबल संघ (एन्फा)सँगको सम्झौता नवीकरण गर्ने पक्षमा देखिएका छन् ।

मंगलबार फिफा विश्वकप–२०२६ छनोटको दोस्रो चरणमा यमनसँगको खेलपछि अल्बर्टो एनेसले सम्झौता नवीकरणको इच्छा व्यक्त गरेका हुन् । एनेस गत फागुनमा नेपाली टिमको मुख्य प्रशिक्षकको जिम्मेवारीमा आएका थिए । 

एन्फाले एनेसलाई एक वर्षको सम्झौतासहित नेपाली टिमको जिम्मेवारी सुम्पिएको थियो । अब एन्फा र एनेसबीचको सम्झौता सकिन तीन महिनामात्र बाँकी छ । अल्बर्टो एनेससँग यूईएफए प्रो प्रशिक्षक लाइसेन्स छ ।

“म यहाँ बस्न मन पराउँछु । सर्वप्रथम म नेपालीलाई माया गर्छु । उनीहरू असल छन् । मैले यहाँ निकै राम्रो महसुस गरिरहेको छु । टिमसँग पनि सहज भइरहेको छ । हामीले खेल हार्यौ । तर, प्राविधिक रूपमा हेर्ने हो भने हामीले केही सकारात्मक कुराहरू पाउन सक्छौँ,” एनेसले भने ।

खेलमा यमनसँग नेपाल २–० ले पराजित भएको थियो । खेलप्रति प्रतिक्रिया दिँदै एनेसले टिमबाट आफूले यस्तो प्रदर्शनको अपेक्षा नराखेको बताए ।

“पक्कै पनि मैले मेरो टिमबाट यस्तो प्रदर्शनको आशा गरेको थिइन । यसप्रकारको खेलका लागि ९० मिनेटसम्म नै खेल्न सक्ने खेलाडी चाहिन्छ । हाम्रो टिमको धेरै खेलाडी चोटिल थिए । हामी शारीरिक रूपमा पनि उनीहरूभन्दा पछि रह्यौं । यसबाहेक, हामीले राम्रो खेल्न पनि सकेनौं । लामो बल धेरै खेल्यौं । हामीले रक्षापंक्तीबाट खेल्न सकेनौं । दोस्रो हाफमा हामीले वान अन वानमा गोल गर्न नसक्नु दुःखद थियो । सायद त्यो भएको भए खेल अर्कै हुन्थ्यो ।”

छनोटमा नेपालको यो लगातार दोस्रो हार हो । यसअघि नेपाल पहिलो खेलमा युनाइटेड अरब इमिरेट् (यूएई) विरुद्ध ४–० ले पराजित भएको थियो । लगातार दोस्रो हार बेहोरेको नेपाल तालिका पुछारमा छ । पहिलो जित निकालेको यमन तीन अंकसहित तेस्रो स्थानमा छ । छनोटमा नेपाल समूह ‘एच’ मा छ । यो समूहमा नेपालसँगै यूएई, यमन र बहराइन छन् ।

त्यसअघि छनोटको पहिलो चरणमा नेपालले लाओसलाई समग्रमा २–१ ले पराजित गरेको थियो ।