काठमाडौं । साहित्यिक सम्मान संगमले यो वर्षको ‘ग्वंगः सिरपा सम्मान’ प्रसिद्ध साहित्यकारहरू प्रा. डा. अभि सुवेदी र प्रा. डा. गोविन्दराज भट्टराईलाई प्रदान गरेको छ । दुवै स्रष्टालाई सम्मानपत्रका साथ जनही ५० हजार पाँच रुपैयाँ नगद राशिको थैली पनि दिइयो ।

शनिबार भक्तपुरको सूर्यविनायकमा आयोजित कार्यक्रममा सो संगमका संस्थापक वरिष्ठ साहित्यकार एवं संस्कृतिविद् तेजेश्वरबाबु ग्वंगःले दुवै स्रष्टालाई सम्मानपत्र प्रदान गरे । ग्वंगःले दुवै सर्जकको चर्चा गर्दै आफूले निबन्ध लेख्न सुरु गर्दाको समय स्मरण गरे ।

डा. सुवेदी र डा. भट्टराईले निबन्ध लेखनको कठिनाइ र आवश्यक साधनाको चर्चा गरे । समालोचक प्रा. डा. लक्ष्मणप्रसाद गौतमले दुवै सम्मानित स्रष्टाका बारेमा बोलेका थिए ।

साहित्यकार ग्वंगःले प्राप्त गरेका पुरस्कारहरूको रकमलाई एक ठाउँमा राख्दै अक्षयकोषका रूपमा विकसित गरी सम्मानको थालनी गरिएको कार्यक्रममा जानकारी गराइएको थियो ।