काठमाडौं । फिफा विश्वकप–२०२६ छनोटको दोस्रो चरणमा युनाइटेड अरब इमिरेट्स (यूएई) सँगको खेलअघि नेपाली टिमका मुख्य प्रशिक्षक भिन्चेन्सो अल्बर्टो एनेसले नेपाल नडराई खेल्ने बताएका छन् ।

नेपालले समूह ‘एच’ मा घरेलु टोली यूएईविरुद्ध खेल्दै प्रतियोगिता सुरु गर्नेछ । खेल राति साढे ९ बजे दुबईमा सुरु हुनेछ । समूह ‘एच’ मा नेपाल र यूएईसँगै बहराइन र यमन छन् । हाल यूएई फिफा वरियताको ६९औँ स्थानमा छ । नेपाल १७३औँ स्थानमा छ ।

यसअघि नेपालले अघिल्लो महिना लाओसलाई पहिलो चरणमा हराउँदै दोस्रो चरणमा स्थान बनाएको थियो ।

यूएईसँगको खेलअघि नेपाली प्रमुख प्रशिक्षक अल्बर्टो एनेसले यूएई राम्रो टिम भए पनि नेपालको तयारी राम्रो रहेको बताए ।

"यूएई हाम्रो समूहको एउटा बलियो टोली हो । तर हामीले पनि राम्रो तयारी गरेका छौँ । हाम्रो टोलीमा युवा खेलाडीहरूको बाहुल्यता छ । त्यसैले यो टोलीमा जोश छ । प्रशिक्षकको रूपमा मेरो टोलीले धेरै बलिया टोलीहरूसँग खेलेको अनुभव छ । त्यसैले बलिया टोलीहरूको स्तरबाट अनुभव लिएका छौँ । यूएई पनि राम्रो टोली हो तर डराएका छैनौं । म यसलाई हरेक पटक आउने नयाँ चुनौतीको रूपमा लिन्छु । म उत्साहित पनि छु की यूएईको नाम चलेको पोर्चुगीज प्रशिक्षकसँग मैदानमा आमने सामने हुँदै छु भनेर । भोलि हामी आफ्नो खेलमा गम्भीर हुनेछौँ र उत्कृष्ट प्रदर्शन गर्नेछौँ," एनेसले भने ।