काठमाडौं । मर्जरमा गएका लघुवित्तहरूले थप प्राथमिक सेयर (एफपीओ) निष्कासन गर्ने क्रम जारी छ । केही समयअघि मिर्मिरे लघुवित्त र उन्नति सहकार्य लघुवित्तले एफपीओ निष्कासन गरिसकेका छन् ।

अहिले पनि नेपाल धितोपत्र बोर्डमा पाँच लघुवित्त एफपीओ निष्कासनको अनुमतिको पर्खाइमा छन् । एफपीओ अनुमतिको पर्खाइमा सूर्योदय वमी लघुवित्त, महुली लघुवित्त, नयाँ सारथी, समता घरेलु र किसान लघुवित्त छन् । 

यी लघुवित्तले २९ करोड चार लाख ३९ हजार २८४ रुपैयाँ बराबरको २८ लाख ५१ हजार ६४९ कित्ता थप सेयर निष्कासन गर्ने छन् । एफपीओ निष्कासनका लागि सूर्याेदय वोमीले २०८० भदौ १८ गते, महुलीले २०८० भदौ २४ गते, नयाँ सारथीले २०७८ भदौ ९ गते, समता घरेलुले २०७८ चैत २९ गते र किसान लघुवित्तले २०७८ असार २९ गते बोर्डमा निवेदन दिएका छन् ।

नयाँ सारथी लघुवित्तले प्रतिकित्ता ११६ रुपैयाँमा एफपीओ निष्कासन गर्ने अनुमति मागेको छ । यो लघुवित्तले तीन लाख २९ हजार ६४९ कित्ता एफपीओ निष्कासन गर्ने अनुमति मागको छ । सबैभन्दा बढी किसान लघुवित्त वित्तीय संस्थाले १६ लाख ६६ हजार ९६५ कित्ता एफपीओ प्रतिकित्ता १०० रुपैयाँमा निष्कासनका लागि बोर्डमा निवेदन दिएको छ ।

सूर्योदय लघुवित्तले ४६ हजार ७३० कित्ता, महुली लघुवित्तले चार लाख ७५ हजार ४४९ कित्ता र समता घरेलु लघुवित्तले तीन लाख ३२ हजार ८५६ कित्ता एफपीओ निष्कासनका लागि बोर्डमा निवेदन दिएको छ ।

बैंक तथा वित्तीय संस्था सम्बन्धी ऐन २०७३ को दफा ९ बमोजिम सर्वसाधारणको पुँजी संरचना ३० प्रतिशत कायम गर्न लघुवित्तले एफपीओ निष्कासन गर्न लागेका हुन् ।