काठमाडौं । सरकारले टिकटक प्रयोगमा प्रतिबन्ध लगाउने निर्णय गरेको विरोधमा विभिन्न संघसंस्थाले आपत्ति जनाएका छन् । सोमबार साँझ एक प्रेस वक्तव्यमार्फत विभिन्न ३० वटा संघसंस्थाका प्रतिनिधिले टिकटकमाथिको प्रतिबन्ध संविधानप्रदत्त स्वतन्त्रताको गम्भीर उलङ्घन भएको बताएका छन् । 

"मन्त्रिपरिषद्को यो निर्णय अत्यन्तै असामयिक र निरंकुश रहनुका साथै यसले लोकतन्त्रको आधारभूत सिद्धान्तमाथि गम्भीर प्रहार भएको तथा नागरिक स्वतन्त्रता र विधिको शासनलाई कमजोर बनाउने निष्कर्ष हाम्रो छ," प्रेस वक्तव्यमा भनिएको छ । 

दृष्टिकोण साझा गर्ने र विश्वव्यापी डिजिटल समुदायमा सहभागी हुने अवसरलाई सीमित गर्ने सरकारको नियत देखिएको उनीहरूको ठहर छ । "यसबाहेक, यस्तो प्रतिबन्धले सामग्री सिर्जनाकर्ताहरू र साना तथा मझौला उद्यमहरूको आर्थिक अवसरहरूमा प्रतिकूल असर पारी उनीहरूको व्यावसायिक स्थायित्वमा गम्भीर जोखिम पर्ने देखिन्छ," उनीहरूले भनेका छन् । 

उनीहरूले निर्णयमा पुनर्विचार गर्न र अभिव्यक्ति स्वतन्त्रताको संवैधानिकरूपमा संरक्षित अधिकारलाई हनन नगर्न आग्रह गरेका छन् ।