![एमसीसी परियोजना समयमा सम्पन्न गर्ने प्रतिबद्धता](https://12khari.top/uploads/posts/NP-Saud-1694077005.jpg)
वासिंटन डिसी । अमेरिकाको भ्रमणमा रहेका परराष्ट्रमन्त्री एनपी साउदले एमसीसी परियोजना समयमा नै सम्पन्न गरिने बताएका छन् ।
आज परराष्ट्रमन्त्री साउद र मिलेनियम च्यालेञ्ज कर्पोरेसनका प्रमुख कार्यकारी अधिकृत एलिस अल्ब्राईटबीच वासिंटन डिसीमा भएको भेटमा मन्त्री साउदले निर्धारित समयमा नै परियोजना पूरा हुने प्रतिबद्धता व्यक्त गरेका हुन् ।
एमसीसी परियोजना पाँच वर्षमा नै सम्पन्न गर्ने विषयमा एमसीसीका अधिकारीसँग छलफल भएको वासिंटनस्थित नेपाली दूतावासले जनाएको छ ।
भेटमा अमेरिकाका लागि नेपाली राजदूत श्रीधर खत्री, परराष्ट्र मन्त्रालयका सहसचिव गणेशकुमार ढकाल, दूतावासका अधिकारीहरुलगायत एमसीसीका उपाध्यक्ष जोनाथन ब्रुक्स, नेपालका लागि अमेरिकाका राजदूत डीन आर थम्सन उपस्थित थिए ।
गत भदौ १२ गतेदेखि कार्यान्वयन भएको उक्त परियोजनाअन्तर्गत नेपालको विद्युत् आपूर्ति र यातायात पूर्वाधार निर्माण गरिनेछ । ५० करोड अमेरिकी डलर अनुदानको उक्त आयोजनमा नेपाल सरकारले १३ करोड डलर योगदान गरेको छ । रासस