काठमाडौं । राष्ट्रियसभा बैठकले राष्ट्रिय मर्यादासम्बन्धी विधेयक, २०७९ लाई पास गरेको छ । मंगलबार बसेको सभाको दोस्रो बैठकले विधेयक सर्वसम्मतले पास गरेको हो । अब यो विधेयक छलफलका लागि प्रतिनिधिसभामा जानेछ ।

यो विधेयक २०७९ चैत १२ मा राष्ट्रियसभामा दर्ता भएको थियो । सोही दिन विधेयकमाथि सामान्य छलफल भएको थियो । विधेयकलाई विधायन व्यवस्थापन समितिमा दफावार छलफलका लागि चैत १६ गते पठाइएको थियो ।

समितिले सोमबार छलफलपश्चात् प्रतिवेदन बनाएर पारित गरेको थियो । मंगलबार बसेको राष्ट्रियसभाको पहिलो बैठकमा समितिको प्रतिवेदनसहित विधेयक पेस गरिएको थियो । १६ मिनेटपश्चात् बसेको दोस्रो बैठकले विधेयकलाई पास गरेको हो ।

“सरकारी एवं सार्वजनिक पदाधिकारी र राष्ट्रिय जीवनमा योगदान गरेका विशिष्ट व्यक्तिहरूको मर्यादाक्रम, अति विशिष्ट तथा विशिष्ट पदाधिकारीलाई गरिने सम्बोधन तथा राष्ट्रिय झण्डा र राष्ट्रिय गानको प्रयोग र अति विशिष्ट तथा विशिष्ट व्यक्तिलाई सम्मान प्रकट गर्ने, सलामी दिने जस्ता विषयहरू अन्तर्सम्बन्धित भएको र यससम्बन्धी प्रबन्धहरू विभिन्न फरक स्रोतहरूमा छरिएर रहेको (निर्देशिका, गृह मन्त्रालयद्वारा राजपत्रमा प्रकाशित सूचना, नेपाल सरकार, मन्त्रिपरिषद्को निर्णय आदि) र कतिपय विषयवस्तुमा अन्योलता समेत पाइने गरेको परिप्रेक्ष्यमा यी विषयहरूलाई ऐनद्वारा नै प्रबन्ध गरिँदा व्यवस्थित हुने देखिएकोले यो विधेयक पेस गरिएको छ,” विधेयकको उद्देश्यमा लेखिएको छ ।