काठमाडौं । संयुक्त राष्ट्रसंघका महासचिव एन्टोनियो गुटेरेसले नेपाल र अरू विकासोन्मुख देशहरूको विकासमा सहयोग गर्न, जलवायुसम्बन्धी कार्यलाई तीव्रता दिन र हालको विश्व संकटको सामना गर्न धेरै ठूलो अन्तर्राष्ट्रिय सहयोग चाहिने बताएका छन् ।

मंगलबार संघीय संसद्का दुवै सदनको संयुक्त बैठकमा उनले दिगो विकास लक्ष्य कार्यक्रम र जलवायु परिवर्तनबाट उत्पन्न समस्या समाधानका निम्ति दीर्घकालीन कोष बनाएर कम्तीमा पाँच खर्ब रुपैयाँ प्रतिवर्ष वितरण गर्ने आफ्नो प्रस्ताव रहेको सुनाए ।

“सदस्य राष्ट्रहरूले गत महिनाको महासभा बैठकमा यो प्रस्तावलाई स्वागत गरेका छन् र यसलाई अगाडि बढाउन प्रतिबद्धता पनि जनाएका छन्,” उनले भने ।

महासचिव गुटेरेसले ढिलाइ नगरी जलवायुमा काम गर्न विश्व समुदायलाई आग्रह गरे । उनले विश्वको तापक्रम वृद्धिलाई १.५ डिग्री सेल्सियसमा सीमित गर्न सबै देशले काम गर्नुपर्ने आवश्यकता औँल्याए ।

नेपालको चारदिने भ्रमणको सिलसिलामा गएको आइतबार गुटेरेस काठमाडौं आएका हुन् ।